ผญาฮักลวง

………………

ฮักลวง

……………..

แต่งงานมีลูกแล้ว  สองคนจนกว่าเก่า

อาศัยข้าวอยู่เล้า  ขายใช้หนี่กะบ่พอ

ได้แต่ขอค้างไว้   ไปทำงานต่างถิ่น

หนี่สินแฮงนักหน่า   ดอกถ่วมหลายกว่าทึน

ฝืนใจจำนำบ้าน   ไฮ่นากู้เงินดอก

ไปทำงานนอกประเทศ  ส่งใช้เงินกู้เขา

ส่งข่าวเมียอยู่เรื่อย  โทร.คุยกันยามว่าง

ปูทางความคึดฮอด  กอดฮักไว้บ่ห่างเหิน

วันคืนจั่งแม่นเยี้น  ยาวหลายยามไกลห่าง

ทางไกลสุดขอบฟ้า  อยากเห็นหน่าได้แค่ฝัน

ส่งเงินให่ทางบ้าน  คู่เดือนบ่เคยขาด

วาดฝันไว้ล่วงหน่า   เหลือใช้หนี่ค่อยเก็บกำ

ทำงานสิบปีแล้ว  แจวคืนเมือบ้านเก่า

เงินเฮาคงหลายแล้ว  อย่างหน่อยกะสิบแสน

บ่ บอกแฟนล่วงหน่า  อยากฮู้ว่าเป็นจั่งใด๋

เมียเฮายังสวยใส   ลูกเฮาใหญ่ส่ำใดแล้ว

สวยได้แนวแม่หรือไม่  ใจเมียยังคือเก่า  บ่-นอ

ซุมพ่อเถ่าแม่เถ่า   จื่อเฮาได้หรือว่าใด๋

กะสิไปเซอไพร้ส์   ไผต่อไผให่ม่วนซืน

สามคืนกะฮอดบ้าน  ไวฟ้าวได้ดั่งใจ

ไผต่อไผมาโฮมตุ้ม  ชุมนุมกันถามไถ่

แปลกใจบ่เห็นหน่า  ลูกเมียแก้วอยู่เฮือน

สอบถามพวกหมู่เพื่อน  ได้ความว่าเมียเฮา

หนีไปเป็นเมียเขา   ตั้งหลายปีมาแล้ว

ถิ่มเฮือนชานแจวอ้าว   ถิ่มลูกสาวลูกชายใหญ่

ให่ตายายเลี้ยงไว้  เทียวมาบ้านวันสิ้นเดือน

เบิกเงินแล้วบ่เห็นส่น  โดนปีแล้วหละหมู่

ไผกะนึกว่าโตฮู้   เลยบ่กล้าเอ่ยถาม

น้ำตาไหลเอ่อล้น  สุดสิทนกั้นอยู่

ไหลพร่างพรูข่างแก้ม  มืองุมไว้ย้านหมู่เห็น

จั๊กแม่นเวรเฮาสร่าง  ปางใด๋ไว้นอหมู่

เมียหอบเงินไปกับชู้  ถิ่มหนี่ให่แม่นใจดำ 

ถิ่มบักหำกับนางน้อย  ให่ยายตาตุ้มเบิ่ง

ตั๊วะบักเผิ่งให่ฝันค้าง   ไปรับจ้างอยู่ต่างแดน

วางแผนการณ์หลายชั้น  คึดบ่ทันเลยถืกบ่วง

เจ้าฮักลวงบ่ฮักแท้   อ้ายยอมแพ้บ่ว่าหยัง  นางเอย