จังซี่มันจังรวย /ยาดีหมอบอก(ผญา)

อยากรวยต้องอ่านผญา จังซี้มันจั่งรวย ฟันธง !

…………………………………………………………..

• มีร้อยบาทกะรวยได้  คันใจคึดว่าเพียงพอ

รวยกว่าขอกู้มารวย  เป็นเศรษฐีเงินล้าน

ดอกเบี้ยบานขึ่นคู่มื้อ  ต้องแล่นหนีลี้อยู่

ต้องขุดฮูอยู่ถ่ำ   ถืกตามเมี้ยนย้อนอยากรวย

• ทำงานหาเงินนั้น   สิได้เงินพอใช้จ่าย

ใช้หลายกะบ่ได้  สิเป็นหนี่ฮอดมื้อตาย

คันใช้เงินทำงานให่  สิได้เงินเต็มถงเต็มไถ่

สนุกกินสนุกใช้  ภายหน่าเป็นเศรษฐี  พุ้นแหล่ว  พี่น้องเอย

• บัตรเครดิตนั้น                มันบังตาให่ใจใหญ่

ใช้เงินไปโดยบ่ฮู้          สิเป็นหนี่ให่ห่างมัน  พี่น้องเอย

• ซื้อรถยนต์คันแรก           ซื้อมือสองสาก่อน

ขับขี่ยังบ่คล่อง               มือสองฮ้างเป็นช่างนำ  พี่น้องเอย

• ประกันชีวิตนั้น               ขาดทึนบ่คุ้มค่า

ฝากธนาคารเอาไว้       ยังพอได้ดอกตื่มมา  พี่น้องเอย

• เสียเงินค่าเช่าบ้าน          นานหลายปีได้แค่เช่า

เอาเงินไปผ่อนบ้าน       นานปีได้เป็นเจ้าของ  พี่น้องเอย

• รายได้หน่อย                  อย่าสร่างเฮือนหลังใหญ่

เงินไปจมอยู่บ้าน            เป็นหนี่ฮอดมื้อตาย  พี่น้องเอย

• เงินหนึ่งบาทที่เก็บไว้       คือเงินบาทที่เฮาหา

ได้เงินมาแบ่งเก็บ           หน่อยหลายกะคือได้  พี่น้องเอย

• การลงทึนค้านั้น             เลือกปลอดภัยไว้ที่หนึ่ง

ผลตอบแทนหลายหน่อย     จั่งค่อยเลือกขั้นต่อมา  พี่น้องเอย

• เงินส่วนหลายนั้น           ให่ลงทึนหม่องบ่เสี่ยง

หม่องเสี่ยงภัยนั้นให่ใช้      เงินส่วนหน่อยเสี่ยงเอา  พี่น้องเอย

• หาได้หลายใช้หน่อย       ค่อยเก็บกำเทือละนอย

บ่จำเป็นให่ใช้หน่อย       คอยเงินล้านบ่โดน  พี่น้องเอย

• ผู้ที่รวยล้นฟ้า                 ขาสิย่างคุงดิน

หากินเทิงเดือนดาว         สาวไหมอยู่เทิงฟ้า  พี่น้องเอย

• ผู้ที่ทุกข์ยากไฮ้               ขาย่างบ่คุงดิน

หากินแต่ของเมา             สาวขาย่างเลาะบ้าน  พี่น้องเอย

…………………….

ยาดีหมอบอก

………………….

• การบูรนั้น                                  อย่าเอาใส่ไว้ในรถ

มันสิเฮ็ดให่งวงนอน        ตอนเฮาขับหลับในได้  พี่น้องเอย

• ต่อมลูกหมากโตนั้น                    กินกระชายแก้ได้อยู่

เป็นมะเร็งกะใช้ได้            ปลูกเอาไว้แนเด้อ  พี่น้องเอย

• ตับบ่ดีกินเต้าฮู้                           หูบ่ดีหยอดหูแน

ใบขี่เหล็กกินซอยแก้                 ขี่คาก้นให้จื่อจำ  พี่น้องเอย

• คันกินข้าวบ่แซบ                        ให้กินขิงหัวอ่อน

นอนบ่หลับให่กินขม              เคือเขาฮอแซ่น้ำเผิ่ง  พี่น้องเอย

• หน้าท้องลายกินหมากพร้าว        น้ำหมากเฟืองทานำแหน่

กินเม็ดบัวสิซอยแก้                 ของบ่ขึ่นยืนบ่ทน  พี่น้องเอย

• ใบกระเพราตากแห่ง                   กินขับเยี่ยวขับลม

ใบหมากยมฮากเตย                 ซอยหัวใจมีแฮงเต้น พี่น้องเอย