กล่าวอำลาเมื่อจบการแสดงวงดนตรีหมอลำ(ผญา)

ข้าพเจ้าจึงเขียนขึ้นตามคำขอ มีทั้งหมด 2 บทกลอน

…………………………………………………

กล่าวลาเมื่อจบการแสดงวงดนตรีหมอลำ 1

ผญา/กลอนลำ

………………………………………………..

การแสดงจบแล้ว       เป็นแนวใดกะตามซ่าง

ต้องได้เงินค่าจ้าง       เอาไปซื้อยาหม่องทา

ทั้งปวดขาปวดข่อ       ซุมหมอลำเพินจ่ม

เต้นจนนมแข่นอั้นตั้น  ยานห่อยปานไข่หำ

ทังหมอลำหมอร้อง     มือกลองกระจับปี่

หมอแคนเป่ายิงยี่         จนใส่ไหลลงหำ

ทังหมอลำหมอฟ้อน  สิเมือนอนทายาหม่อง

ได้พ้อกันเทือหน่า      จั่งมาดิ้นใส่เพลง

เต้นละเลงหน่าฮ้าน     ให่ม่วนมันเต็มที่

จนขี่ดินไงง่อง           สองฮูดังอั้นบ่หันใจ

มาถึงสุดท้ายแล้ว       สิแจวลาสาก่อน

ขออวยพรส่งท้าย       ให่อ้ายน้องคู่สู่คน

ให่เจ้ามีสุขล้น           ความทุกข์จนให่หนีห่าง

ย่างนำทางได้พบพ้อ   แฟนซ้อนผู้หร่อสวย

ให่เจ้ารวยลื่นล้น        ลุลาภเป็นเศรษฐี

มีทรัพย์สินเงินทอง     หลั่งไหลมาเฮือนเจ้า

ไหลมาเต็มเล้าข้าว        เต็มกระบุงเต็มกะต่า

จ้างวงข่อยมาเล่นเทือหน้า  เงินค่าจ้างคึดบ่แพง  พี่น้องเอย

……………………………………………………..

กล่าวอำลาเมื่อจบการแสดงวงดนตรีหมอลำ  2

ผญา/กลอนลำ

………………………………………………………

การแสดงจบแล้ว              สิแจวลาสาก่อน

ตอนมีงานเทือหน้า            จั่งมาพ้อพบกัน

การแสดงผ่านไปนั้น           ลำบ่มันร้องบ่ม่วน

ลำบ่ชวนให่อยากเด้ง          เพลงร้องกะเก่าเกิน

ทั้งลำเดินลำซิ่ง                บ่ติงลิงติงให้อยากม่วน

หางเครื่องบ่ชวนให้อยากเด้า ลำขอข้าวกะบ่ปาน

กราบอภัยทุกท่าน             หวานใจอย่าฮ้ายจ่ม

อดสากินหมากส้ม             เทือหน่าจั่งกินแตง

น้ำใจพี่น้องบ่แห้งแล้ง         ฮักแพงบ่แหนงหน่าย

ขายตั๋วเข้าชมได้               เงินซื้อแป้งคู่สู่คน

ขอบพระคุณอย่างเหลือล้น   ลูกหลานจนบ่มีแนวสิให้ต่อ

นอกจากขออวยพรส่งท้าย   ให่อ้ายน้องคู่สู่คน

ให่เจ้ามีสุขล้น                  ความทุกข์จนให่หนีห่าง

ย่างนำทางได้พบพ้อ          แฟนซ้อนผู้หร่อสวย

ให่เจ้ารวยลื่นล้น               ลุลาภเป็นเศรษฐี

มีทรัพย์สินเงินทอง            หลั่งมาบ่มีอั้น

ขอให้ฝันของหมู่เจ้า           เป็นจริงทุกสิ่งอย่าง

สุขสมหวังสู่ด้าน               งานเงินพร้อมคู่สู่อัน  เด้อพี่น้อง