ความรัก(ผญา)

 โลกนี้จะมีความสุขราวกับแดนสวรรค์  เมื่อสองคนรักกันอย่างดูดดื่มและมีชีวิตอยู่เพื่อกันและกัน

…………………..

ฮักครั้งแรก
………………….

ฮักแรกนั้น  ใจสิสั่นงันงก

ตกตะลึงจังงัง  ดังเป็นบ้าใบ้

หัวใจสิโตนเต้น  ตูมตามตุ้มตึง

สะเทือนฮอดก้นบึ้ง  ถึงขั้วก้นหัวใจ

คือกำลังเป็นไข้  หนาวในในใจสั่น

ใจผูกพันแหน่นอิ้งติ้ง  ติงได้ตั้งแต่ตา  นางเอย

……………………………………………………………

-ฮักกันนั้น  ข้าวปั้นเกลือกะอร่อย

แม่นว่ามีลาบก้อย ชังแล้วบ่อยากเหลียว  นางเอย

-ยิ้มให้กันนั้น คือการกอดระยะไกล

ผูกไมตรีให้ยืนยาว เสริมฮักเฮาให้คงหมั่น นางเอย

-คันบุพเพเคยสร้าง เป็นผัวเมียกันแต่ชาติก่อน

ตอนแรกเห็นพ้อหน่า สิฮักหมั่นปานว่าเคย ซั่นแหล่ว นางเอย

-มีคู่ครองหวังไว้ ได้อาศัยพาเฮาย่าง

ผัวเป็นช้างเท้าหน่า เมียเป็นช้างเท้าย่างหลัง  พี่น้องเอย

-คันปุพเพเคยสร่าง   ฮ่วมกันแต่ชาติก่อน

บุญสิหลอนส่งให่ ฮักกันได้ดั่งเดิม  นางเอย

-ฮักเจ้าแล้ว  เป็นแนวใด๋กะตามซาง

บ่สมหวังได้แต่งเจ้า ฮอดมื้อเถ่ากะสิคอย  นางเอย

-บ่มีสิทธิ์ฮักเจ้า  สิลี้อยู่คือกบ

พบคนเดินผ่านมา  กระโดดจ๋อมลงน้ำ  นางเอย

-เพิ่มความฮักให่หลายขึ่น อายุยืนยาวยิ่ง

เพิ่มคนฮักมากหน่า อายุสั้นย้อนเมิดแฮง  พี่น้องเอย

-ฮักกันนั้น วันคืนบ่คือเก่า

ตื่นมื้อเช้า    เค้าหน้าหล่าเหลือง พี่น้องเอย

-อ้ายฮักเจ้า  ตั้งแต่แรกเหลียวเห็น

ทั้งกลางเว็นกลางคืน   ฝันเห็นแต่หน่าเจ้า  นางเอย

-อ้ายฮักเจ้า   ตั้งแต่แรกเหลียวเห็น

อ้ายอยากเป็นแฟนนาง ว่าจั่งใด๋นอเจ้า  นางเอย

คึดฮอดเจ้า                    เบิ่งเดือนดาวแฮงคึดฮอด

อ้ายอยากอดเจ้าไว้                     นอนแนบข่างบ่ห่างกัน  นางเอย

-คึดฮอดเจ้า เบิ่งเดือนดาวกะบ่ส่วง

ป่วงคือเป็นบ้าใบ้  ใจไข่บ่ส่วงหาย  นางเอย

-คึดฮอดเจ้า   เบิ่งเดือนดาวกะบ่ส่วง

ป่วงเป็นคือบ้าใบ้ สิไปหน่าผัดถอยหลัง  นางเอย

-อ้ายฮักเจ้า    ตั้งแต่แรกได้ยินเสียง

เพียงได้ยินจ๊ะจ๋า  เจ้าโทรมาอ้ายฮักโลด  นางเอย

-ฮักเฮานั้น   วันคืนมีคุณค่า

มีสัญญาผูกไว้ ใจเขียนขึ้นฮ่วมกัน  นางเอย

-อ้ายอักเจ้า   ฮักทุกสิ่งที่เจ้ามี

ฮักทุกอบ่างที่เจ้าเป็น  ฮักทุกอันที่เป็นเจ้า นางเอย

-อ้ายนี้ หวังสิมาสมส่าง  ถางโพนปลูกหมากถั่ว

มาเป็นผัวพาส่าง   ทางเจ้าว่าจั่งใด  นางเอย

-คันผัวมีเมียน้อย    ปล่อยไปอย่าฮ้ายด่า

ผัวคืนมาให่ค่อยเว้า เอาดีเข่าผูกมัดใจ  นางเอย

-คันแม่นผัวกินเหล่า    เมามาอย่าฟ้าวด่า

ถ่าให่ผัวส่วงเหล่า จั่งค่อยเว้าค่อยจา  นางเอย

-หาคนดีบ่ได้   ให่ป็นโสดดีกว่า

แต่งกับคนชั่วช้า  เป็นขี่ข้าฮอดมื้อตาย  นางเอย

-การสิเลือกผัวนั้น อย่าสรรหาแต่รวยหร่อ

เลือกกะดั๊กกะด้อ   พอวัยเถ่าได้ขึ่นคาน  นางเอย

-การเลือกผัวเมียนั้น  อย่าแข่งขันยาดแย่ง

แต่งกับคนที่ยาดได้  มันบ่คุ้มเทื่อหย่ากัน  พี่น้องเอย

-การเป็นผัวเมียนั้น อยู่นำกันบ่เบื่อหน่าย

เติมฟืนไฟอยู่เรื่อย สิยืนหมั่นฮอดมื้อตาย  พี่น้องเอย

-เมื่อเฮามีลูกเต้า   เฮาต้องฮักแต่อย่าหลง

ให่หมั่นคงส่งเสริม   เฮียนให่สูงเอาไว้  พี่น้องเอย

 

-การสิสอนลูกเต้า   เฮาต้องเชื่อครูอาจารย์

ให่ลูกอ่านหนังสือ  เฮ็ดรายงานส่งครูพร้อม  พี่น้องเอย

-คันลูกติดเกมแล้ว           มีแต่แนวยุ่งยาก

ติดยาบ้าแฮงเป็นฮ้าย     แลงงายหน่าบ่เห็น  พี่น้องเอย

-การส่งเสริมลูกให่  เล่นดนตรีกีฬาเด่น

เป็นการซอยลูกให่ ได้ของเล่นดีกว่าเกมส์ พี่น้องเอย

-การส่งเสริมลูกเต้า  ให่เข่าวัดทำบุญ

สิเป็นทุนความสุข  เสริมลูกเฮาให่ดีได้  ซั้นแหล่ว พี่น้องเอย

-ฮักกันนั้น   พัวพันหลายมันกะหน่าย

หยอกกันไปสะอิ้กสะอ้อย หลอยกอดเรื่อยสิฮักโดน พี่น้องเอย

…………………………………………………………………………………