จีบสาวสมัยใหม่(ผญา)

1. แฟน

ชาย…ขอเป็นแฟนบ่ได้ ให่เป็นกิ๊กได้บ่นอ

พอได้โทรเอิ้นเจ้า ไปกินข้าวห้องอาหาร  นางเอย

 

หญิง…ขอเป็นแฟนบ่ได้  ให่เป็นกิ๊กพอได้อยู่

นางย้านแฟนนางฮู้    สิหึงฮ้ายไล่ตี  อ้ายเอย

………………….

2. กิ๊ก

ชาย..ได้เป็นกิ๊กเจ้านั้น มันกว่าได้เป็นแฟน

ถึงบ่แมนเจ้าของ   แต่ม่วนมันจนลืมบ้าน  นางเอย                                              

หญิง..เป็นกิ๊กน้อง  ฮู้กันสองเฮาเด้อพี่

อย่าสิได้ปากโป้ง  ไทยบ้านเพินสิหยัน  อ้ายเอย

 

………………

3.  ก๊ง                                       

ชาย..ขอเป็นกิ๊กบ่ได้ ให่เป็นกั๊กกะไคแน่

เป็นบ่ได้แท้แท้  ให่เป็นก๊งกะว่าดี  นางเอย  

                                                     

หญิง..เป็นกิ๊กกั๊กบ่ได้ดอก  แฟนเอาตายอ้ายฮู้บ่

ขอเป็นก๊งพอให่ได้  คันแม่นอ้ายจ่ายบ่เซ็น   อ้ายเอย 

……………….

4. อุ๊กอั่ง

ชาย..เฮ็ดนาเกลือไปแลกข้าว ขายนำพอได้ค่า 

ฝนตกมาอุ๊กอั่งเอ้า นอนไห่เฝ่าน้ำท่วมเกลือ  นางเอย

 

หญิง..เฮ็ดนาข้าว  ถ่าแลกเกลือพอได้ค่า

ฝนตกมาอุ๊กอั่งเอ้า  ถ่าเกลือเจ้ากะบ่เห็น  อ้ายเอย

 

ชาย…เฮ็ดนาข้าว ขายนำพอได้ค่า 

ฝนบ่มาอุ๊กอั่งเอ้า ข้าวตายเกลี้ยงบ่ยัง  นางเอย

 

หญิง..เฮ็ดนาเกลือไปแลกข้าว  ขายนำพอได้ค่า

ฝนตกมาอุ๊กอั่งเอ้า  เกลือแลกข้าวบ่มี  อ้ายเอย

……………..

5. ย้าน

ชาย…กบเขียดฮ้อง เอิ้นหาแฟนมากอดก่าย  

อ้ายนี่นั่งให้ย้าน ค่าดองน้องต่อบ่ลง  น้องเอย

 

หญิง….กบเขียดฮ้อง เอิ้นหาแฟนมากอดก่าย   

น้องนี่นั่งให่ฮ้อง ย้านมีท้องก่อนแต่งงาน  อ้ายเอย

 

ชาย…..คันแม่นเจ้ามีท้อง  เงินค่าดองกะต่อง่าย

บ่ต้องต้กใจดอกน้อง  คันมีท้องอ้ายสิขอ  น้องเอย

 

หญิง….มีเงินพอบ่ละอ้าย  ค่าดองหลายตั้งล้านหนึ่ง

เงินบ่ถึงต่อบ่ได้  อยากอายบ้านเพินกล่าวขวัญ  อ้ายเอย

 

ชาย….ให่เจ้าคุยกับแม่ไว้  เรื่องเป็นจั่งใด๋ให่บอกเพิน

อ้ายสิกู้เงินมาแต่งเจ้า   เทือเพินลดให่จั๊กเคิงจั๊กกลาง  น้องเอย

 

หญิง…..อ้ายมีเงินท่อใด๋แล้ว  ขาดท่อใด๋น้องสิขอแม่

คันแม่นอ้ายฮักน้องแท้    แม่เคยเว้าว่าส่ำมี  อ้ายเอย

 

ชาย…คันแม่นเป็นคือแม่เว้า  มื้อใหม่สิมาขอ

อ้ายขอเมือปรึกษา   พ่อแม่หาเงินไว้

พร้อมมื้อใด๋สิมาหมั่น   เฮาจากกันท่อนี้ก่อน

น้องเข้านอนเตรียมโตไว้   อ้ายสิมาเว้าสู่ขอ  น้องเอย

 

หญิง….อย่าตั๊วกันเด้ออ้าย   อย่าถิ่มนางเด้อพี่

น้องนี้หวังตั้งต่ออ้าย   บ่มีมื้อเปลี่ยนใจ  อ้ายเอย

 

ชาย…..อ้ายกะคือกันนั้นละน้อง  บ่สองใจฮักผู้ใหม่

ยากปานใด๋กะสิสู้   มาขอเจ้าแต่งงาน

อ้ายสิลาเมือบ้าน  อยู่นานมันสิค่ำ

ฝนตกฮำฟ้าฮ้อง  ภัยฮ้ายส่องบ่เห็น  น้องเอย

 

หญิง…เมือดีเด้ออ้าย   อย่าขับรถไวหลายเด้อพี่

ขับรถดีดีเมือฮอดบ้าน   ฝันถึงน้องผู้ถ่าคอย..แน่เด้อจ้า  อ้ายเอย

 

ชาย…อ้ายเมือก่อนเด้อ  น้องเอย

 

หญิง….จ้า  อ้ายเอย

 

 

………………………..

จีบสาวหุ่นเซ็กซี่

………………………

ชาย..เพียงแต่เหลียวเห็นก้น   สนใจอยากถามไถ่

อ้ายอยากเป็นแฟนเจ้า คันแมนก้นเจ้าอีหลี  นางเอย

 

หญิง..น้องนี้พันธุ์งามก้น  ตนโตฮูปฮ่าง

ก้นของนางอีหลีอ้าย  คันไผพ้อกะแม่นบุญ  อ้ายเอย

 

ชาย…คันแม่นเป็นจั่งเว้า  สิให่แม่มาขอ

รอข้อยจั๊กเจ็ดวัน  สิหมั่นหมายขอเจ้า

สิเอาทองมาหมั่น  มัดจำกอนแต่ง

ค่าดองแพงกะสิสู่  บอกให่ฮู้ว่าฮักจริง  นางเอย

 

หญิง…หากะเคยพ้อหน้า  เอ่ยวาจาสิมาแต่ง

ค่าดองแพงสิบล้าน  คันอ้ายสู่สิแต่งนำ  อ้ายเอย

 

ชาย…ค่าดองแพงสิบล้าน   มันจิ๊บจ้อยซะเหลือเกิน

เงินอ้ายมีเป็นตัน  สิหมั่นหมายแต่งเจ้า  นางเอย

 

หญิง…ย้านแต่เป็นเงินเก้  ทองเหลืองซุบใหม่

ใส่บ่พอเคิงมื้อ  สิเหลืองแหล่ลอกดำ  อ้ายเอย

 

 ชาย…แม่นอีหลีตั๊วะละน้อง  ทองเหลืองคือน้องว่า

วาสนาอ้ายส่ำได้เว้า   วาสนาเจ้าขั่นคุณนาย

อย่าเว้าดังหลายคนสิฮู้  ให่หลูโตนคนบ้านอื่น แน่เด้อ

คันสิบหมื่นพอสู่ได้   สิบแสนอ้ายสู่บ่ไหว  นางเอย

 

หญิง…ค่าดองนางสิบล้าน  บ่แพงดอกคันฮักจริง

อ้ายขายสิ่งขายของ     โฮมกันกะพอแล้ว  อ้ายเอย

 

ชาย…จั๊กสิขายหยังแหล่ว  จั่งสิพอมาขอแต่ง

ค่าดองแพงสิบล้าน  แต่งบ่ได้อ้ายบ่มี  นางเอย

 

หญิง… ความฮักนั้น  ซื้อขายกันบ่ได้ดอก

เจ้าฮักข่อยข่อยฮักเจ้า  สิบ่เว้าเอาค่าดอง  อ้ายเอย

 

ชาย…อ้ายนี้คึดฮักเจ้า  ตั้งแรกเหลียวเห็น

จั้กมันเป็นจั่งใด๋   ฮักเจ้าหลายเอากะด้อ  นางเอย

 

หญิง…ฮักซังนั้น  แม่ให่เก็บไว้ในใจ

อย่าฟ้าวไขวาจา  ห่าบ่จริงคนสิเย้ย

สิเปิดเผยฮักนั้น  นานปีบ่เป็นอื่น

ความฮักยืนจั่งค่อยใบ้  บอกให่ฮุู้กะบ่สาย  อ้ายเอย

 

ชาย…คันบ่คึดซังอ้าย  อ้ายสิหมั่นมาหา

 แบ่งเวลาหัวใจ  ให่อ้ายนำแนจั๊กหน่อย

อย่าให่คอยนานเนิ้น  เดือนปีเปลี่ยนผ่าน

เพราะหัวใจอ้ายนั้น  ฝากเจ้าไว้แต่ผู้เดียว  นางเอย

 

หญิง…แม่นางเพิ่นสอนไว้  อย่าไว้ใจบ่าวบ้านอื่น

ตื่นมื้อเช้า  เห็นหน่าจั่งว่ามา

คำเว้าจาเชื่อบ่ได้  นานไปมักเป็นอื่น

พื้นเพอ้ายนางบ่ฮู้  มีเมียแล้วหรือว่าใด๋  อ้ายเอย

พูด…นางบ่แม่นธนาคารหัวใจ  รับฝากหัวใจอ้ายบ่ได้ดอกจ้า

 

ชาย…อ้ายนี้ปลอดอ้อยซ้อย  เสมออ้อยกลางกอ

กาบกะบ่ห่อ  หน่อน้อยกะบ่แซม  ซั้นแหล่ว  นางเอย

 

หญิง…คำว่าปลอดอ้อยซ้อย  ฝอยไปให่มันคล่อง

ความจริงน้องบ่ฮู้   ลายหลังอ้ายน้องบ่เห็น  อ้ายเอย

 

ชาย…อ้ายนี้ถือศีลห่า  บ่มุสาย้านศีลขาด

วาสนามีได้พ้อเจ้า   ใจฮักแล้วจั่งเอ่ยคำ  นางเอย

 

หญิง….คนหนุ่มถือศีลห้า  บ่มีดอกอย่าตั๊วะกัน

มันสิเป็นบาปกรรม  ติดโตไปภายหน้า  อ้ายเอย

 

ชาย…อ้ายนี้ถือศีลห้า  รับมายังอุ่นอุ่น

ให้อ้ายหนุนตักเจ้า  จั่งสิฮู้ว่าเรื่องจริง  นางเอย

 

หญิง…สิหลอกหนุนตักนั้น  บ่ได้ดอกอ้ายอย่าฝัน

นางฮู้ทันความคึด  อ้ายวางแผนจั่งใด๋ไว้  อ้ายเอย

 

ชาย…อ้ายบ่ได้หลอกเจ้า  อ้ายเว้าไปตามใจคึด

อ้ายยึดถือคำสัตย์  คันบ่จริงสิบ่เว้า  นางเอย

 

หญิง…..คันแม่นจริงคืออ้ายเว้า  เฮาคบกันให้นานก่อน

อ้ายเมือนอนคึดคักแล้ว  มื้อใหม่พุ้นจั่งค่อยมา  อ้ายเอย

 

ชาย…คันเจ้าเว้าจั่งซั้น  แลงมื้ออื่นอ้ายสิมา

มื้อนี้ลาเมือคึด  คือดั่งคำที่นางเว้า

ฮักเจ้าหลายบ่มีมื้อ  เปลี่ยนใจไปเป็นอื่น

เมิดคืนสิฝันเถิงเจ้า  คึดฮอดอ้ายแนเด้อ  นางเอย

พูด…อ้ายเมือก่อนเด้อ  นางเอย

 

หญิง…ให้เมือดีเด้ออ้าย  อย่าขับรถไวหลายเด้อพี่

ขับรถดีดีเมือฮอดบ้าน   ไลน์บอกน้องผู้ถ้าคอง แน่เด้อจ้า  อ้ายเอย