ผญาทักทายและอวยพร

กล่าวเมื่อได้รับเชิญให้ขึ้นพูดในงานต่าง ๆ  มี  7  บทกลอน

……………………………..

1.  งานทำบุญผ้าป่า

………………………………

นมัสการพระคุณเจ้า  ที่เคารพอย่างสูง

สำบายดีคู่คน  ที่สนใจมางานนี้

ผลามีได้พ้อหน่า  วาสนาหลายได้มาฮ่วม

มาตุ้มโฮมเป็นพี่น้อง  มาตีฆ้องฮ่วมบุญ

ขอบพระคุณทุกท่าน  ที่ดูแลเอาใจใส่

แนวใดแซบหาให่  ใจหมู่เจัาจั่งแม่นดี

คันมีใจให่กันแล้ว  แจ่วเกลือกะอร่อย

แม่นว่ามีลาบก้อย  ซังแล้วบ่อยากเหลียว

ข่อยสิเทียวหาหมู่เจ้า  เอาผ่าป่ามานำ

มาทำบุญนำกัน  ผูกพันเป็นพี่น้อง

มาเป็นทองผืนแหน่น  แผ่นเดียวกันหมั่นแก่น

มาเป็นแฟนฮ่วมบ้าน  เฮือนซานต้อดเข่าฮ่วมกัน

โจ๊ะบทบั้น  ทักทายกันท่อนี้ก่อน

ขออวยพรส่งท้าย  ให่หมู่เจ้าจงอยู่ดี

อย่าได้มีเหตุฮ้อน  สรรพสิ่งอันใด

โพยภัยหาย  อันตรายให่หนีเกลี้ยง

ชื่อเสียงให่ดังก้อง  เงินทองให่ลุหลั่ง

สุขสมสมหวังคู่ด้าน  ผลทานเจ้าให่ซ่อยซู

ผู้ใด๋ฮูบฮ่างฮ้าย  ให่สวยหล่อละออตา

ผู้ชราสูงอายุ   เป็นบ่าวสาวใสซิ่ง

แขนขาแข่นอิ้งติ้ง  เคาะหม่องใด๋กะดังติงติง

หม่องใด๋ยานต้วบต้วย  ให่เต็มตั้งดั่งบ่าวสาว

ให่เจ้ามีเป็นได้   สมใจเจ้าคู่อย่าง

ผู้ที่เป็นหม่ายฮ้าง  ได้แฟนฮู้ฮักจริง

ซุมบ่าวสาวใสซิ่ง  ได้แฟนจริงสวยหล่อ

ซุมพ่อแม่พี่น้อง  มีแฟนแล้วให่หมั่นยืน

นอนหลับนั้น  ได้เงินพันเงินหมื่น

ตื่นขึ่นได้  โชคพันล้านเป็นเศรษฐี  คู่คนเด้อ

…………………………………….

2. งานวันขึ้นปีใหม่

……………………………………

สำบายดีทุกท่าน  ที่มางานวันปีใหม่

วันที่ไทยทุกท่าน  หวังไว้สิเปลี่ยนแปลง

วันที่แสงตะเว็นจ้า   ฟ้าสีทองอ่องต่อง

วันที่มวลอ้ายน้อง  คอยถ่าว่าสิมี

วันที่หวังปลดหนี่  มีเงินทองแหน่นอั่ง

วันที่หวังวาดไว้   สิรวยล้นเป็นเศรษฐี

วันสิมีคู่ซ้อน  บ่นอนหนาวคือแต่ก่อน

วันสินอนห่มเนื้อ   เฟือข่างผู้บ่าวผู้สาว

วันที่เฮาวาดไว้   ได้มีเป็นสรรพสิ่ง

วันเป็นจริงคือวาดไว้  ปีใหม่เริ่มคู่สู่อัน

จบบทบั้น  ทักทายกันท่อนี้ก่อน

ขออวยส่งท้าย  อวยพรให่เจ้าอยู่ดี

อย่าได้มีเหตุฮ้อน   สรรพสิ่งอันใด

โพยภัยหาย  อันตรายให่หนีเกลี้ยง

ชื่อเสียงให่ดังก้อง  เงินทองให่ลุหลั่ง

สุขสมหวังคู่ด้าน  การงานเจ้าให่ฮูงเฮือง

ทั้งการเมืองการมุ้ง  ม่วนมันบ่มีเมือย

มิดมับม้อย  เมิดสิ้นอย่าสิมี

สิ่งใดดีให่หลั่งเข่า  โพยภัยให่ไกลห่าง

ทางชีวิตปีใหม่นี้  มีสุขล้นตลอดปี

ผู้ใดมีแฟนแล้ว  ให่หมั่นยืนยาวยิ่ง

บ่าวสาวสวยใสซิ่ง  ได้แฟนซ้อนดั่งใจ

ผู้ใดฮูปฮ่างฮ้าย  ให่สวยหล่อละออตา

ผู้ชราสูงอายุ  เป็นบ่าวสาวใสซิ่ง

แข้งขาแข่นอิ้งติ้ง  เคาะหม่องใด๋กะดังติงติง

หม่องใด๋ยานต้วบต้วย  ให่เต็มตั้งดั่งบาวสาว

มักสาวลาวกะให่  ได้สาวไทยคือเก่า

ตื่นมื้อเช้า  ตะเว็นขึ่นสู่วัน

นอนหลับนั้น  ได้เงินพันเงินหมื่น

ตื่นขึ่นได้  โชคพันล้านเป็นเศรษฐี  คู่คนเด้อ สาธุ

…………………………………

3.  งานเลี้ยงรับส่ง

……………………………….

สำบายดีทุกท่าน  ที่มางานเลี้ยงรับส่ง

ใจประสงค์อยากพบพ้อ  ผู้เพิ่นย้ายไปจากเฮา

อยากได้ฟังคำเว้า   จากใจก่อนสิจาก

กับอยากฝากสิ่งของให่  เพื่อกันไว้บ่ให่ลืม

ที่เคยยืมเงินใช้  ลืมมันสาเด้อท่าน

ทานให่หมู่พวกบ้าง  ไปทางหน่าสิฮูงเฮือง

ที่เคยเคืองคัดข้อง  หมองใจกันให่ถิ่มปล่อย

เรื่องวุ่นวายใหญ่น้อย ให่ไลถิ่มก่อนสิไป

ดีใจหมู่ได้ย้าย  สมตั้งใจทุกสิ่งอย่าง

นับมื้อห่างจากกันแล้ว  ได้พบพ้อต่อมื้อฝัน

คันหมู่ไปทางหน่า  หากินบ่กุ้มปาก

ทุกข์ยากหลายลื่นล้น ทนบ่ได้ให่บอกกัน

เฮาสิผันรถอีแต็ก  รถอีแต๋นไปแหนแห่

แก่หมู่มาอยู่พี้  ดีฮ้ายกะดังเดิม

ขออวยพรเสริมให้  หมู่ไปดีมีสุขยิ่ง

สิ่งใดดีให่หลั่งเข่า  สิ่งใดฮ้ายให่หลั่งหนี

ตำแหน่งงานดีขึ่น  เงินทองบ่อึ้ดอยาก

ความลำบากอย่าพบพ้อ  โพยภัยฮ้ายให่ห่างไกล

สุขสำบายปานได้ขึ้น  เมืองสวรรค์เด้อเสี่ยว

สมใจเคียวคู่ด้าน   เงินงานพร้อมคู่สู่อัน  เสี่ยวเอย

……………………………

4. งานแต่งงาน

………………………….

ข่าขอนบนอบไหว่  ประธานใหญ่ในงาน

สุขสำราญคู่คน  ที่สนใจมางานนี้

วันที่มีงานเลี้ยง  สังสรรค์วันแต่ง

น้องคำแพงฮักกันหมั่น  พัวพันไว้ด้วยฮักหลาย

ขอแสดงความดีใจด้วย  เจ้าสาวสวยเจ้าบ่าวหล่อ

เหมาะสมกันกะด้อ  ซ่างหาพ้อกะซ่างเป็น

ข่อยอยากเห็นหมู่เจ้า  มีลูกหลานเหลนหล่อน

ขอออนซอนล่วงหน่า  ว่าลูกเจ้าต้องหล่อสวย

จึงขออวยพรให่  ได้มีเป็นทุกสิ่งอย่าง

ตามที่หวังวาดไว้  สมใจเจ้าใฝ่ฝัน

มีลูกหลานไวฟ้าว  เป็นบ่าวสาวเจ้าได้เพิง

ไทยบ้านได้ยกย่อง  มวลพี่น้องได้เพิงพา

ให่เจ้ามีอายุหมั่น  ขวัญยืนยาวยิ่ง

สิ่งใดดีให่หลั่งเข่า  สิ่งใดฮ้ายให่หลั่งหนี

เป็นเศรษฐีพันล้าน  การงานให่ลุหลั่ง

ย่างไปใสไทยบ้านหุ่ม แห่แหนเจ้าด้วยฮักแพง

ความแข็งแฮงคงมั่น  บ่มีวันแปรเปลี่ยน

ผิวพรรณเนียนปานยังน้อย  มีข่อยข่าซอยแฮง

ฮักแพงกันฮอดมื้อเถ่า  ดูแลกันฮอดมื้อแก่

เป็นแม่ตู้พ่อตู้    ชูไม้เท้าซอยกัน  พุ้นหละเด้อ

…………………………………………..

5.  งานพบปะสังสรรค์ตุ้มโฮม

………………………………………….

สำบายดีทุกท่าน  ที่เคารพรักฮักแพง

มาพาแลงตุ้มโฮม  คุยกันกินข้าว

เจ้ามีปลามีเหล้า  ข่อยมีผักกะเดาปิ้งไข่

เจ้ามีอบไก่ผู้โจ้น   ข่อยมีผักกะโดนจ้ำแจ่วบอง

มีของกินกองโจ้โก้  แบ่งกันกินคุยกันม่วน

อิ่มแล้วชวนกันออกดิ้น  ใส่เพลงเด้งให่ม่วนมัน

คันมีใจให่กันแล้ว  เหยียบตีนกันกะบ่ว่า

เตะก้นนำกะบ่เว้า  ข่อยฮักเจ้าอย่างเดียว

หาผูกเสี่ยวเอาไว้   อายุใกล้เคียงกันเด้อละท่าน

คันผูกเสี่ยวกับพ่อเถ่า  ซุมหมู่เจ้าอย่ากระทำ

ให่มียำเกรงไว้  ควรบ่ควรให่คึดก่อน

ขออวยพรส่งท้าย  ให่พี่น้องคู่สู่คน

ความทุกข์จนอย่ามาใกล้  โพยภัยให่หนีห่าง

ผู้ที่เป็นหม้ายฮ้าง  หาแฟนได้ป่านคึดเอา

ผู้ใดมีแฟนเถ่า  ให่แข็งแรงแฮงบ่หล่า

วาสนาหลายได้ช้างเถ่า  ขายงาได้ค่าแพง

สาวคำแพงน้องชายหล่า  ให่หาแฟนได้สวยหร่อ

ซุมพ่อแม่พี่น้อง  มีแฟนแล้วให่หมั่นยืน

นอนหลับนั้น   ได้เงินพันเงินหมื่น

ตื่นขึ่นได้  เงินคำแก้วหลั่งโฮม…เด้อ

…………………………………………………

6.  งานอบรมคุณธรรมจริยธรรม

………………………………………………….

นมัสการพระคุณเจ้า ที่เคารพอย่างสูง       

สำบายดี คู่คน  ที่สนใจมางานนี้

ผลามีได้พ้อหน่า  วาสนาหลายได้มาฮ่วม    

มาตุ้มโฮมเป็นพี่น้อง มาตีฆ้องฮ่วมบุญ

ขอบพระคุณทุกท่าน  ที่ดูแลเอาใจใส่

แนวใดแซบหาให่  ใจหมู่เจัาจั่งแม่นดี

คันมีใจให่กันแล้ว  แจ่วเกลือกะอร่อย

แม่นว่ามีลาบก้อย ซังแล้วบ่อยากเหลียว

ข่อยสิเทียวหาหมู่เจ้า คันส่งข่าวไปเถิง      

แม่นสิเหิงปานใด ใจผูกพันเป็นพี่น้อง 

สิเป็นทองผืนแหน่น  แผ่นเดียวกันหมั่นแก่น 

มาเป็นแฟนฮ่วมบ้าน  เฮือนซานต้อดเข่าฮ่วมกัน

โจ๊ะบทบั้น  ทักทายกันท่อนี้ก่อน        

ขออวยพรส่งท้าย  ให่หมู่เจ้าจงอยู่ดี

อย่าได้มีเหตุฮ้อน  สรรพสิ่งอันใด              

โพยภัยหาย  อันตรายให่หนีเกลี้ยง

ชื่อเสียงให่ดังก้อง  เงินทองให่ลุหลั่ง 

สุขสมสมหวังคู่ด้าน  เงินงานพร้อมคู่สู่อัน

คันไผฮูบฮ่างฮ้าย  ให่สวยหล่อลออตา     

ผู้ชราสูงอายุ   เป็นบ่าวสาวใสซิ่ง

แขนขาแข่นอิ้งติ้ง  เคาะหม่องใด๋กะดังติงติง   

หม่องใด๋ยานต้วบต้วย  ให่เต็มตั้งดั่งบ่าวสาว

ซุมบ่าวสาวส่ำน้อย  ให้สวยใสรูปหล่อ      

ขอเงินพ่อแม่ได้คู่มื้อ ไปโรงเรียนให่ครูฮักแพง

ให้แข็งแรงเก่งพร้อม  เป็นคนดีพอได้เพิง

เถิงพระธรรมทุกถ่วนหน้า ปัญญากว้างเลี่ยนไหล

สอบเทือใดกะให่ได้  สมใจได้แต่สี่

เป็นคนดีทุกถ่วนหน้า  พาพี่น้องให่ฮ่างมี

ขอให้วัดแห่งนี้   จงเป็นที่สุขสงบ               

ดลให่เฮาได้มาพบ  พ้อกันอีกเทือหน่า

ครูอาจารย์ให่ยืนหมั่น  ฮักแพงกันบ่เป็นอื่น  

อายุยืนฮอดร้อย ห่าสิบปีถ่วนคู่สู่คน

ความทุกข์จนอย่ามาใกล้  อันตรายอย่ามาผ่า 

สุขสำบายทุกถ่วนหน่า รวยล้นเป็นเศรษฐี….เด้อพี่น้องเอย

…………………………………………………

7.  งานทำบุญผ้าป่า

………………………………………………….

นมัสการพระคุณเจ้า  ที่เคารพอย่างสูง

สำบายดีสู่คน  ที่มางานบุญวันนี้

ผลามีได้พ้อหน่า  วาสนาหลายได้มาฮ่วม

มาตุ้มโฮมเป็นพี่น้อง  มาตีฆ้องฮ่วมบุญ

ขอบพระคุณอย่างเหลือล้น  ที่เชิญผมมากะล่าว(กล่าว)

เว้าผญาฝากพี่น้อง  ได้หัวยุ้มซุ่มใจ

เว้าไปหลายมันสิข้อง  ลองใส่หลายมันสิเก่า

เกิดมาโดนมันสิเถ่า  มีงานเข้าจั่งว่ากัน

ขอบพระคุณทุกท่าน  ที่ดูแลเอาใจใส่

แนวใดแซบหาให่  ใจหมู่เจัาจั่งแม่นดี

คันมีใจให่กันแล้ว  แจ่วเกลือกะอร่อย

แม่นว่ามีลาภก้อย  ซังแล้วบ่อยากเหลียว

ข่อยสิเทียวหาหมู่เจ้า  เอาซองผ่าป่ามานำ

มาทำบุญนำกัน  ผูกพันเป็นพี่น้อง 

มาเป็นทองผืนแหน่น  แผ่นเดียวกันหมั่นแก่น

มาเป็นแฟนฮ่วมบ้าน  เฮือนซานต้อดเข่าฮ่วมกัน

ขออวยพรให้ทุกท่าน  สุขสำราญการเป็นอยู่

มวลหมู่ทุกข์ยากไฮ้  ให้ไลข้างห่างหนี

อย่าได้มีเหตุฮ้อน  สรรพสิ่งแนวใด

โพยภัยหาย  อันตรายให่หนีเกลี้ยง

ชื่อเสียงให่ดังก้อง  เงินทองให่ลุหลั่ง

สุขสมสมหวังสู่ด้าน  เงินงานพร้อมคู่สู่อัน

คันไผฮูบฮ่างฮ้าย  ให้สวยหร่อละออตา

ผู้ชราสูงอายุ   เป็นบ่าวสาวใสซิ่ง

แขนขาแน่นอิ้งติ้ง  เคาะหม่องใด๋กะดังติงติง

หม่องใด๋ยานต้วบต้วย  ให่เต็มตั้งดั่งบ่าวสาว

อายุยืนยาวหมั่น  พันปีศรีสง่า

สุขอยู่ในใต้หล้า  มาโฮมเจ้าสู่วัน

นอนหลับนั้น  ได้เงินพันเงินหมื่น

ตื่นขึ่นได้  เงินคำแก้วหลั่งโฮม

โอม อุ อะ มุ มะ มูลมา สะทา โสตถี ภะวันตุ โน โหตุ สัพพะทา สาธุ …..เพี้ยง!

……………………………………….