ผญาการแข่งขันกีฬา อบต.

เขียนตามคำขอ  ปรับใช้ตามสภาพนะครับ

 

……………………………..

กลอนที่  1

กล่าวต้อนรับ

…………………………….

ขอต้อนรับพี่น้อง  อบต.โคกสูงหนองกี่บุรีรัมย์

นำทีมโดยนายก   อบต.หล่อเฟี้ยวฟ้าว

ตามด้วยสาวบ่าวซิ่ง  จากอบต.ทั้งแปดหมู่

อยู่กันคนละบ้าน   แต่วันนี้มาฮ่วมกัน

บ้านโคกสูงนำหน่า  ต่อมาบ้านคูขาด

บ้านโนนสวรรค์มาดซิ่ง  บ้านสะเดาหวานนิ่งมาดแมน

บ้านขุนแผนหนองหว้า   บ้านโนนสมบูรณ์มาดใหญ่

บ้านสระตะเคียนมาดหล่วยหล่าย   หมักด๋าวด่ายบ้านหนองนกเขา

บ้านสระกระแตเป็นเจ้าบ้าน  ประสานงานติดต่อ

นั่งจอบทางพ้อว้อ  รอหมู่พวกเพินเข่ามา

ตอนนี้มาฮอดแล้ว   เถิงสนามหม่องขันแข่ง

นายกเฮาใจบ่เคยแล้ง  จัดงานนี้ด้วยหัวใจ

ดื่มน้ำในหายเมื่อยแล้ว  จั่งแข่งขันฟันฝ่า

แม่นเป็นตาชนะได้   หรือเป็นแพ้พลิกผัน

กะซ่างมันเด้อพี่น้อง   ม่วนนำกันนี่หละแม่น

คันเป็นแฟนกันได้  แพ้ชนะกะซ่างมัน  พี่น้องเอย

………………………………..

กลอนที่  2

กล่าวชักชวนคนมาชมกีฬา

…………………………………….

สวัสดีครับพี่น้อง   ที่เคารพรักฮักแพง

ที่มาฮ่วมแข่งขัน  กีฬา อบต.ในเทือนี้

ผลามีได้พ้อหน้า  วาสนาหลายได้มาฮ่วม

มาตุ้มโฮมเป็นพี่น้อง  ตีกลองตึ้งแข่งขัน

มาชมเชียร์นำกันให่  ม่วนชื่นโฮแซว

เป็นเด็กแนวนำกัน   ม่วนมันจนลืมบ้าน

มาแข่งขันให่มันฮู้   ไผเป็นไผ แม่นไผใหญ่

นายกอบต.เฮาจัดให่  ในเทือนี้ม่วนหลาย 

อย่าฟ้าวตายเด้อพ่อตู้ แม่ตู้  พ่อใหญ่แม่ใหญ่กะคือกัน

มาชมเชียร์ลูกหลาน   ให่ม่วนมันต่อจากหนี่

รถบ่มีกะมาได้   ให่ลูกหลานพามาเบิ่ง

บ่ทันเหิงกะแข่งแล้ว  มาช้าสิบ่ทัน

การกีฬาจัดเทือนี้   วัตถุประสงค์มีสี่อย่าง

หนึ่ง เพื่อให้ลูกหลานห่างหาย   ยาเสพติดบ่กลายใกล้

สอง  เพื่อให่ลูกหลานได้   ร่างกายดีแข็งแกร่ง. 

สาม  เพื่อให่ลูกหลานมีน้ำใจบ่แห่งแล้ง  แข่งขันแล้วฮู้อภัย

สี่  เพื่อให่ลูกหลานทั้งหลายได้  ลึ้งแก่นกันกับบ้านอื่น

ได้ม่วนชื่นตื่นเต้น   ยามลงเล่นแข่งขัน

ความพัวพันสิเหนียวแหน่น  ไผบ่มีแฟนอย่าฟ้าวจ่ม

ให่มาชมข่างสนามพี้   มีบ่าวสาวซิ่งหล่อสวย   พี่น้องเอย

………………………………………..

กลอนที่  3

กล่าวขอบคุณและอวยพร

………………………………………

การแข่งขันจบแล้ว  เป็นแนวใด๋กะตามซ่าง

โฆษกบ่มีค่าจ้าง  เมื่อยม้อยกะซ่างมัน

ขอบพระคุณทุกท่าน ที่มาฮ่วมในงาน

ทั้งผู้มาแข่งขัน    มาชมเชียร์จนงานแล้ว

ผู้ได้ถ้วยได้แห่ว  กะเล่นดีมันม่วน

ขอบคุณอย่างเหลือล้น  ขอบคุณถ่วนคู่สู่คน 

ขอบพระคุณผู้เป็นต้น   ความคึดพาจัดงาน

นายกผู้กล้าหาญ  พร้อม อบต.แปดหมู่บ้าน

ข้าราชการทั้งสิ้น  ได้ฮวมกันเป็นหนึ่ง

ขอบพระคุณอย่างสุดซึ้ง  งานถึงเป้าย้อนเพินนำ

ให่เฮาจำหมู่เพินไว้   พ้อหม่องใดให่ถามไถ่

ได้เลือกตั้งเทือหน่า   กาให่โลดคณะเฮา

ขออวยพรให่หมู่เจ้า  กลับเมือเฮือนอย่างสะดวก

พวกอุบาทว์พยาธิฮ้าย  ให่ไลข่างห่างหนี

ให่เจ้ามีเป็นได้    สมใจทุกสิ่งอย่าง

ย่างไปใสแตกตึ้มตึ้ม  แฟนหุ่มแห่แหน

ถืกเต็มตีนแข่นแข่น  ในงวดใหม่สิมาเถิง

ถืกทั้งเทิงสามโต    ทั้งลุมนำเด้อเจ้า

เงินทองไหลหลั่งเข่า  เต็มโถงเต็มไถ่

เป็นเศรษฐีใหญ่สุขหมั่น   พันปีแล้วยังหนุ่มสาว   เด้อ  พี่น้องเอย