ผญาจีบสาววัยรุ่น

 

ชาย…เหลียวเห็นสาววัยรุ่น  หุ่นบางเบาเป็นตากอด

กะเลยดอดเข้านั่งใกล้  ถามไถ่เว้าเบิงก่อนนา  พี่น้องเอย

พูด…นาง ๆ  อ้ายขอนั่งนำได้บ่  …เจ้าจื่ออ้ายได้บ่

 

หญิง…นั่งโลดอ้าย   แต่นางจื่ออ้ายบ่ได้ดอกจ้า  อ้ายชื่อหยังจ้า

 

ชาย…ชื่อสาครตั๊วะหล่า  ชื่อเหล่นว่าบักหัวงอน

ตอนน้องเฮียนอนุบาล   อ้ายนั้นเฮียนมอห่า

ผลามีได้พ้อเจ้า  เป็นสาวสวยเกือบบ่จื่อ

มื้อนี้มากับแฟนบ่ละน้อง  มีคนจองแล้วหรือว่าใด๋  นางเอย

 

หญิง…สวัสดีญาอ้าย  หัวงอนแฟนเอื้อยต่าย

สำบายดีบ่ละอ้าย  บ่ได้พ้อตั้งแต่โดน  อ้ายเอย

พูด…นางยังบ่มีแฟน  กำลังมองหาผู้บ่าวมาจองอยู่จ้า

 

ชาย…ต่ายเขาแต่งงานแล้ว  แฟนเขารวยเถ่าแก่ใหญ่

วาสนาอ้ายมีหน่อย  ถอยหลังลี้เกือบบ่ทัน  นางเอย

พูด…คันซั้นอ้ายขอจองเจ้าได้บ่  นางเอย

 

หญิง…คนมาจองนางนั้น  มีนำกันแล้วสี่

อ้ายเป็นคนที่ห้า  ที่มาเว้ากล่าวจอง  อ้ายเอย 

พูด…นางกำลังคึดอยู่ว่าสิเลือกผู้ใดเป็นแฟนจ้า  อ้ายเอย

 

ชาย….อ้ายเสนอโตเป็นแฟนเจ้า   เอาบ่เอากะบ่ว่า

วาสนามีอ้ายถืกเลือก  เป็นแฟนเจ้ากะแม่นบุญ  นางเอย

พูด…รับอ้ายไว้พิจารณานำแนเด้อ  นางเอย

 

หญิง…เสนอโตเป็นแฟนน้อง    มีค่าดองพอบ่

แม่นางมาดค่าไว้ หนึ่งแสนบาทขาดโต  อ้ายเอย

 

ชาย…คันเจ้าเลือกอ้ายนั้น  มันจิ้บจ้อยเรื่องค่าดอง

เงินทองอ้ายมีหลาย   งัวควายมีเต็มคอก   นางเอย

พูด…เรื่องเงินค่าดองบ่มีปัญหาสำหรับอ้าย  นางเอย

 

หญิง…คันอ้ายเว้าจังซั้น   ได้ทันทีเลยอ้ายพี่

คันมีเงินไปขอโลด  ลดบ่ได้ต้องหนึ่งแสน เด้อ  อ้ายเอย

พูด…มาขอมื้ออื่นโลดอ้าย  นางสิบอกแม่ให้เตรียมการต้อนรับ  อ้ายเอย

 

ชาย…คันนางเว้าจั่งซั้น  อ้ายสิเมือบอกพ่อแม่

หาเถ่าแก่มาหมั้นไว้  ปลายปีพุ้นจั่งแต่งงาน นางเอย

พูด…อ้ายสิมาหมั้นไว้ก่อนเด้อ  นางเอย

 

หญิง…แม่นางบ่เอาหมั้น  แต่งงานโลดจั่งสิเอา

เรื่องหมั้นหมายอ้ายเซาคึด  แต่งอย่างเดียวท่อนั้น  อ้ายเอย

พูด…แม่นางว่าย้านนางเป็นแม่ฮ้างขันหมาก  อ้ายพร้อมมื้อใดกะยกขันหมากมาสู่ขอแล้วกะแต่งงานแล้วเทือเดียวโลดมันจั่งบ่เปลืองเงินเปลืองแฮงจัดงานหลายเทือ อ้ายเอย

 

ชาย….คันแม่นางบ่เอาหมั้น  มันกะจั๊กจั่งใด๋อยู่

อ้ายกะยังบ่ฮู้  นางฮักอ้ายหรือว่าใด๋    นางเอย

พูด…คือสิใจฮ้อนแท้ละนาง  แม่นเจ้าฮักอ้ายอีหลีบ้อ  นางเอย

 

หญิง…นางนี้คึดคักแล้ว   ผู้ใด๋ขอนางก่อน

ผู้นั้นละแน่นอน  ฮักนางอีหลีแท้

ส่วนผู้แวมาเว้า  เลยไปจีบผู้ใหม่

นางบ่เอาดอกอ้าย  หลายใจฮ้ายบ่แน่นอน  อ้ายเอย

พูด…นางคึดว่าผู้ใดมาขอนางก่อน ผู้นั้นละฮักนางอีหลี  อ้ายเอย

 

ชาย…อ้ายนี้คึดฮักเจ้า  ตั้งแต่แรกเหลียวเห็น

ฮักทุกสิ่งที่เป็นนาง    ฮักทุกอันที่เป็นเจ้า  นางเอย 

พูด…อ้ายฮักเจ้าหลายอีหลี   นางเอย

 

หญิง…ฮักนางแต่คำเว้า  แต่งเอานางแต่คำว่า 

คำเว้าจาเชื่อบ่ได้  คันฮักแท้ให่มาขอ  อ้ายเอย

พูด….ฮักแต่คำเว้าเชื่อบ่ได้ดอก  คันฮักนางอีหลีต้องมาขอ  อ้ายเอย

 

ชาย…เงินค่าดองพร้อมแล้ว  วันเวลาต้องหาก่อน

ฤกษ์บ่ดีสิเดือดฮ้อน  แต่งแล้วกะฮ้างกัน  นางเอย

พูด….แต่งงานต้องให่ถืกฤกษ์งามยามดีจังสิบ่ฮ้างบ่ถิ่มกัน  นางเอย

 

หญิง…คันอ้ายเว้าจั่งซั้น  นางกะบ่ขัดใจ

แล้วแต่ทางอ้ายเป็น   แต่งมื้อใด๋กะได้

มื้อนี้ไปเลาะเล่น  ในเมืองนำกันก่อน

ตอนใกล้ค่ำจั่งโงโค้ง  ส่งนางแล้วอ้ายค่อยเมือ  อ้ายเอย

พูด…ไปเที่ยวในเมืองนำกันก่อนเนาะอ้ายเนาะ  มื้อนี้อ้ายเลี้ยงฉลองสัญญาใจแนเด้อจ้า  อ้ายเอย

 

ชาย…คันประสงค์จั่งซั้น  กะโอเคเลยน้องพี่

กอดแอวดีดีเด้อน้องหล่า  สิพาซิ่งเบิ่งเมือง

เรื่องให่เลี้ยงฉลองนั้น    นางเลือกร้านไว้ในใจ

อยากสิกินร้านใด   สิพาไปตามใจเจ้า  นางเอย

 

หญิง….อย่าขี่ไวเด้ออ้าย  นางย้านตายก่อนแต่ง

อย่าสิแซงทางโค้ง   ตกลงได้สิขี่นำ  อ้ายเอย

 

ชาย….ตกลงตามใจเจ้า  เอาตามเจ้าคู่อย่าง

น้องนั่งหลังอ้ายนั่งหน้า  มาขึ้นรถอย่าย้านหลาย  น้องเอย

 

หญิง….นางขึ้นนั่งนำแล้ว  แจวไปเลยอ้ายพี่

ขับดีดีเด้ออ้าย   โก่งแอวให้น้องกอดนำ  อ้ายเอย

 

ชาย….กอดแหน่นแหน่นเด้อน้องหล่า  ยับเข้ามาอีกจั๊กนอย

เอาเข่าแนบอ้ายจั๊กหน่อย  ยามรถซิ่งจั่งบ่เซ  น้องเอย

พูด…บรื้น ๆ ๆ ๆ  ………

 

หญิง…หมวกกันน็อคบ่ใช้  อย่าไปทางถนนใหญ่เด้อ

ด่านตำรวจตั้งเท้อเล้อ  ให่เลี้ยวซ้ายจั่งปลอดภัย อ้ายเอย

 

ชาย….คึดคือกันอยู่ดอกน้อง  เงินทองแฮงหายาก

หากถืกปรับห่าร้อย   เงินเลี้ยงน้องสิบ่พอ  น้องเอย

 

หญิง…ขี่ตระเวณไปเรื่อย  เมื่อยยามใด๋กะจอดก่อน

หานั่งหลบแดดฮ้อน  ตามร้านค้าไอติ๋ม  แนเด้ออ้าย  อ้ายเอย

 

ชาย…เฮามาเถิงร้านค้า   ไอติ๋มคือน้องว่า

น้องหาหม่องนั่งถ่า  ส่วนว่าอ้ายสิสั่งติ๋ม  น้องเอย

 

หญิง….น้องเอาติ๋มใหญ่แซบ  หวานหอมถ่วยใหญ่

ใส่แห้วจั๊กแปดก้อน  ตอนได้ย่ำจั่งแซบมัน        อ้ายเอย

 

ชาย….คันอยากกินติ๋มแซบ  ต้องคอยนานแนจั๊กนอย

คอยให่เพิ่นใส่แห้ว  เพินปรุงแล้วจั่งแซบมัน  น้องเอย 

พูด…แซบบ่น้องหล่า

 

หญิง…(พูด)แซบหลายอ้ายเอย

ขอบคุณหลายเด้ออ้าย  เลี้ยงไอติ๋มถ้วยใหญ่

มื้อนี้ใกล้ค่ำแล้ว  เมือฮอดบ้านสิพอดี  อ้ายเอย

 

ชาย…ค่ำแฮงดีตั๊วะน้อง  อ้ายอยากลองนอนรีสอร์ต

เล่นกอดกันให้อุ่นแล้ว  จั่งเมือบ้านเบิ่งเป็นหยัง  น้องเอย

 

หญิง….อุ๊ย บ่ได้ดอกอ้าย   แม่เอาตายอ้ายฮู้บ่

ยังบ่ขอบ่หมั้น  สิฟันโลดน้องบ่ยอม  อ้ายเอย

 

ชาย….อ้ายเว้าเล่นดอกน้อง  อยากลองใจน้องเบิ่ง

เถิงมื้อแต่งกะได้  ตามใจเจ้าคู่สู่อัน  น้องเอย

พูด…อ้ายเว้าเล่นลองใจเจ้าเบิง  ห่าเทือน้องคึดคืออ้าย   น้องเอย

 

หญิง….คึดคือกันอยู่ดอกอ้าย  ชายหญิงบ่แตกต่าง

แต่ว่านางย้านมีท้อง  อ้ายถิ่มน้องบ่หล่ำเหลียว  อ้ายเอย

 

ชาย…คันแม่นนางมีท้อง  เงินค่าดองอ้ายสิตื่ม

สิยืมเงินแม่เถ่า   แต่งเอาเจ้าทันที  น้องเอย

พูด…เงินค่าดองเจ้าผู้เดียวหนึ่งแสนบาท  คันมีลูกแถมเงินค่าดองกะต้องเพิ่มเป็นสองแสนบาท  น้องเอย

 

หญิง….อ้ายกะซ่างหาเว้า  เอาคำลวงมาอ่อย

แม่น้องคอยอยู่บ้าน   สิพาลฮ้ายให่ด่วนเมือ  อ้ายเอย

พูด…นางยังเป็นเด็กน้อย คันอ้ายพานางเมือฮอดบ้านค่ำ แม่นางกะสิหาเถ่าหาแก่มานั่งถ่าปรับไหม คันบ่มีเงินจ่ายอ้ายกะติดคุก  อ้ายคึดเบิงคัก ๆ  อ้ายเอย

 

ชาย…ขอบใจที่เตือนอ้าย  แม่นว่าใจอยากไปต่อ

แต่ต้องพอไว้ท่อนี้   ย้านมีเรื่องถืกปรับไหม   น้องเอย

พูด….ให่อ้ายแยงหน้าเจ้าคัก ๆ แนเด้อ    น้องเอย

 

หญิง…แยงให่คักโลดอ้าย  ส่งสายตาให่เบิงแน

แม่นจริงใจฮักแท้  หรือตั๊วะต้มให้ห่มหนาม  อ้ายเอย

 

ชาย…สายตาอ้าย   ส่องจากใจสัตย์ซื่อ

ถือความฮักเป็นที่ตั้ง  หวังแต่งเจ้าอย่างเดียว  น้องเอย

 

หญิง….โบราณเพินสอนว่า…

หนทางไกลยาวเยิ้น   ให่ฟ้าวเดินมันสิค่ำ

ซาวนำพั้วหมากหว่า  มันสิซ้าค่ำทาง  อ้ายเอย

พูด….ฟ้าวสตาร์ทรถ ไปส่งน้องก่อนตามสัญญา  อ้ายเอย

 

ชาย….อ้ายสตาร์ทรถแล้ว  นั่งกอดแอวโดยด่วน

รถโตนหลุมระวังไว้   กอดให่แน่นอย่าปล่อยมือ  น้องเอย

พูด…ฮอดบ้านน้องก่อนค่ำแน่นอน  น้องเอย

 

หญิง…หม่องเป็นหลุมเป็นร่อง  กะหลีกแน่อย่าโตนหลาย

มันสบายแต่คนขับ  คนซ้อนนำแอวสิซ้ง  อ้ายเอย

 

ชาย…ส่งนางฮอดเฮือนแล้ว  อ้ายสิแจวลาจาก

หากอ้ายเมือฮอดบ้าน  สิฝันเถิงเจ้าผู้เดียว  น้องเอย

 

หญิง…ให่เมือดีเด้ออ้าย  อย่าแวไปจีบผู้ใหม่

ส่งลายน์มาให่ฮู้  คันฮอดบ้านอย่าสิลืม  เด้อ  อ้ายเอย