ผญาบุญผ้าป่า

…………………….

กลอนที่  1

……………………..

เป็นหยังคนจั่งย้าน  ซองขาวบุญผ้าป่า

จ๊กออกมาแต่ละครั้ง  คนอ้อมข่างแล่นหนี

จั๊กแม่นดีหรือฮ้าย  หนีตายย้านซองผ่าป่า

หวาดผวาซองยื่นให่  ต๊กใจย้านแล่นหนี  

เหตุที่เป็นจั่งสี้  เพราะผ่าป่ามีหลากหลาย

จั๊กแม่นไผเป็นไผ   แจกซองกันให่มั่ว

เงินเข่าตัวเองพร้อม  เข่าวัดนำคนละเคิง

เป็นผ้าป่าบักเผิ่ง  บ่เข้าวัดกะหากมี

เดิมทีนั้น   บุญผ่าป่ากะคือบุญ

มันบ่เป็นชุลมุน  คือผ่าป่าสมัยนี้

คนบ่ดีเห็นฮู้  ทางหาเงินได้ง่าย

อาศัยชาวพี่น้อง  แจกซองแล้วกะได้เงิน

ลงทึนเดินไปซื้อ  ซองผ้าป่าตามโรงพิมพ์

แจกซองแล้วตีขิม   ถ่านับเงินท่อนั้น

ความฝันเป็นจริงได้  เงินไหลมาเติบอยู่

เห็นหมู่เฮ็ดหลายคนแล้ว  แนวนี้กะหากมี

เมียเป็นชีผัวโชเฟอร์  พากันไปเลาะล่อง

หาแจกซองตามหมู่บ้าน   หาเงินเข้าใส่กระเป๋า 

ค่ำลงมาหาเช่าห้อง  ฉลองกันมันม่วน

แบ่งปันส่วนเงินที่ได้  ถองเหล้าเอากัน

ผ้าป่าแนวนี้นั้น  กะม่วนชื่นโฮแซว อยู่ดอกหวา

แถวอิสานกะเคยมี  แต่ว่าโดนนานแล้ว

เลยนำมาแซวเล่น  อย่าฮ้ายกันเด้อท่าน

คึดย้านโตบาปฮ้าย  เลยเสี่ยงเว้ากล่าวเตือน

กรรมคู่มื้อนี้เพื่อน  ติดจรวจนำวิถี

แม่นสิลี้อยู่ใส   กะตามไปทันคู่หม่อง

ส่องยิงบ่มีพลาด   ยิงบาดใด๋หงายกืงดืง

ยิงไปถึงฮอดบ้าน  ที่ดินพร้อมมุนทลาย

คันแม่นตายไปแล้ว  ยมบาลส่งลงนรก

ถีบลงขุมอทินนา  ความผิดฐานตั๊วต้ม

ให้ลงงมน้ำฮ้อน  นอนดิ้นตายแล้วฟื้นใหม่

สิตายเลยกะบ่ได้  เพราะกรรมชี้ห้าร้อยปี

พ้นนรกขุมนี้  ยังมีขุมมุสาอยู่

ขุมสุราอีกพร้อม  รอเมี้ยนเจ้าต่อไป

กว่าสิพ้นนรกได้   หลายพันปีพระเพิ่นว่า

พระมาลัยเพิ่นเว้า  พระพุทธเจ้าเพิ่นสอน ซั้นแหล่ว พี่น้องเอย

…………………….

กลอนที่  2

……………………..

ในสมัยพระพุทธเจ้า  ยังทรงพระชนม์อยู่

หมู่พระสังฆเจ้า  เอาผ่าบ่มีเจ้าของ

ที่โยมกองถิ่มไว้  ในดงพงป่า

ผ่าถิ่มตามป่าช้า  มายิบย้อมห่มกาย

เพื่อบังอายบังฮ้อน  หนาวลมห่มอุ่น

เริ่มเป็นบุญเมื่อโยมฮู้  หลูโตนพระว่าทุกข์หลาย

จึงเอาผ่าไปแขวนไว้  ในดงพงป่า

เพื่อให่พระหาพ้อ  เก็บเมือไว้ห่มกาย

หมอชีวกเป็นผู้ได้  ทูลขอจากพุทธองค์

ให่ทรงพระกรุณา  ผ่อนผันพระหาผ่า

โยมศรัทธาถวายให่  พร้อมปัจจัยทั้งสี่

พระยินดีรับได้   วินัยบ่ห่ามอีกต่อไป

ชื่อผ่าป่านั้นไซร้  ให่คงเดิมคือเก่า

องค์พระพุทธเจ้า   อนุญาตให่ตามที่ขอ

ตกมาพ.ศ.นี้     ผ่าป่ามีตั้งหลายอย่าง

มีเปลี่ยนแปลงไปบ้าง   ตามเจ้าภาพสิคึดกัน

วัตถุประสงค์นั้น  กะแตกต่างกันไป

ผ่าจีวรถวายพระ  ส่วนปัจจัยเอาไปส่าง

เอาไปม้างแซมซ่อม  ส้วมศาลาหม่องพระอยู่

ซ่อยคุณครูส่างฮั้ว  ซ่อยจัวน้อยจ่อยโซ

เอาไปโมทนาส่าง  หอระฆังน้ำส่างท่อ

เจาะบาดาลขุดสระน้ำ  ซื้อชามหม่อกะทะไห

มีวัตถุประสงค์ใด๋กะได้  เพื่อให่วัดกับชุมชน

ส่างถนนหนทาง    ส่างศาลาท่าน้ำ

ฝากไว้ยามพระป่วยไข่  ไปหาหมอพอได้เพิง

เป็นค่ารถบักเผิ่ง  พาพระไปปิ่นปัว

บ่ อน อัวแนวสิใช้  เบิกปัจจัยจากผ่าป่า

อานิสงส์จึงมากล้น  จนผู้ข่าจื่อบ่ไหว

ผ่าป่านี่หละใช่  ไทยพุทธเฮาทุกหมู่เหล่า

เอาเป็นจุดริเริ่ม  เสริมส่างก่อกุศล

คนใดมีศรัทธาส่าง  กองบุญทอดผ้าป่า

โฮมศรัทธาพี่น้อง  สิ่งของพร้อมปัจจัย

นำไปถวายให่  แก่พระสงฆ์ดังว่า

อานิสงส์กะสิได้  สมด้ามดังหมาย

คันแม่นตายสิได้ขึ่น  เมืองสวรรค์ชั้นม่วน

บริบูรณ์ครบถ่วน  ผ่าป่าซ้วนซอยสู่คน   ซั้นแหล่ว  พี่น้องเอย