ผญาแซวการเมือง

 

1. ม็อบบ่มีเส้น  อย่าสิเป็นมันเสี่ยง

เพียงแต่คึดกะคุกแล้ว  กินแต่แห้วบ่ได้เงิน  พี่น้องเอย

 

2. ม็อบมีเส้น  ให่ฟ้าวเป็นมันบ่สี่ยง

เสบียงบ่อึ้ดอยาก  ได้เงินพร้อมจั่งแม่นดี  พี่น้องเอย

 

3. เสื้อแดงใส่อยู่บ้าน  ไปโรงพยาบาลใส่เสื้อสีอื่น

คันอยากยืนให่จื่อไว้  อยากตายถิ่มแล้วแต่ใจ  พี่น้องเอย

 

4. ใส่เสื้อเหลืองคนย้าน  ไปโรงบาลหมอกะซ่อย

นายทหารใหญ่น้อย  ซ่อยเหลือพร้อมเคารพนำ  พี่น้องเอย

 

5.  อย่าขยับกรวยท่าน  พระอาจารย์สิทำโทษ

ม็อบเสื้อเหลืองสิโกรธเจ้า  เอาไปฆ่าถ่วงนที  พี่น้องเอย

 

6.  ประชาธิปไตยไทยนั้น  คือทหารเป็นใหญ่

ข้าราชการเป็นลูกน้อง  ประชาชนต้องบ่ปากบ่ไอ  พี่น้องเอย

 

7.  ประชาธิปไตยเจ๊กนั้น  พรรคคอมมิวนิสต์เป็นใหญ่

นายทหารเป็นลูกน้อง   ประชาชนต้องเข้าแถว  พี่น้องเอย

 

8.  ประชาธิปไตยฝรั่งนั้น  ประชาชนเป็นใหญ่

นายทหารเป็นลูกน้อง  ข้าราชการต้องเป็นแหล่งเขา  พี่น้องเอย

 

9.  แต่ละประเทศนั้น  แตกต่างบ่คือกัน

คนคือกันแต่บ่คือ  สะดือยาวสะดือสั้น

ฝันเห็นคนละด้าน  ไผมันแตกต่าง

เทิงบาดย่างบาดเว้า  บาดกินข้าวกะต่างกัน  พี่น้องเอย

 

10. เลือกตั้งท้องถิ่นนั้น  สำคัญที่เงินจ่าย

คนจ่ายหลายได้ขี่ช้าง   คนจ่ายหน่อยตกม้าตาย  ท่านเอย

 

11. เลือกตั้ง สว.นั้น  สำคัญที่มีกระแส

ยิงกระสุนไปนำ  ให่ทั่วเถิงจั่งสิได้  ท่านเอย

 

12.  เลือกตั้ง สส.นั้น  สำคัญที่พรรคใหญ่

พรรคมะลวยควยข่วง  กระสุนด้านชาวบ้านเมิน  ท่านเอย

 

13. เลือกตั้ง สส.นั้น  สำคัญที่พรรคใหญ่

นโยบายใช้ได้  ไทยบ้านฮักบ่เอาเงิน  ท่านเอย 

 

14.  การไปเลือกตั้งนั้น  เป็นหน้าที่ทุกคน

ผลประโยชน์นำกัน  ผูกพันเมิดประเทศ

แม่นสิเกิดเหตุฮ้อน  หน้าที่เฮาต้องมาก่อน

แต่ว่าตอนไปเลือกตั้ง   ไกลใกล้ต้องใช้เงิน

ค่าเดินไปเลือกตั้ง  ควรสิมีนำแน่

แม่นบ่ได้แท้แท้  ซาวบาทกะว่าไค

เป็นค่าไปเลือกตั้ง  ค่าน้ำมันค่ากินอยู่

ค่าปลาทูขี่ก้าง  ค่าจ้างรถไปคูหา  

ส่วนว่าไผสิแจกนั้น  กะแล้วแต่สิคึดเห็น

ให่เป็นรัฐบาล   หรือผู้สมัครกะได้

ออกกฎหมายให่ถืกต้อง   ลองเบิงจั๊กสมัย

ห่าเทือไคกว่าจั้บกั๋น  วุ่นวายบ่เลิกบ่แล้ว

แนวความคึดผู้ข่า  หวือหวาแนจั๊กนอย

คึดซ่อยได้ส่ำนี้   ดีฮ้ายส่องบ่เห็น   ท่านเอย

 

15.  นักการเมืองท้องถิ่นนั้น  ส่วนใหญ่บ้าอยากดัง

หมากสตังค์บ่มี  หากู้เงินมาเล่น

พอได้เป็นวางมาดโก้   แต่งโตดีเข่าท่า

ขับรถหาเลาะเล่น  หาเมียน้อยซ่อยคะแนน  ซั้นแหล่ว  พี่น้องเอย

 

16.  รัฐธรรมนูญไทยนั้น  ห้ามวิจารณ์มันสิบิ่น

ห้ามติฉินว่าดีฮ้าย  ยอย้องได้อย่างเดียว  พี่น้องเอย

 

17. นักการเมืองนั้น  โกงโฉ่งฉ่างให่คนเห็น

โกงบ่เป็นกะยังโกง  เป็นตาชังเอาฮ้าย

กะเลยตายน้ำตื้น   ติดตารางสมพื้นบ่

คุยวอวอว่าบ่ย้าน  ต้องย้ายบ้านเข้าตาราง  ซั้นแหล่ว  อาวเอย

 

18.  คนที่โกงเป็นนั้น   ต้องยกให้ราชการ

ปรมาจารย์ด้านโกง  แนบเนียนในทุกเรื่อง

เซื่องเงินเมียกะสุดยอด  ถอดปุดฮูบ่ปืง

ถึงจับได้กะรอด   หลักฐานชี้ว่าบ่โกง     อาวเอย

 

19. นักการเมืองที่ดีนั้น  ต้องดีต่อประชาชน

ทั้งคนจนคนมี  ดีต่อเขาเสมอหน้า

ทั้งคนดีคนบ้า  คนด่าซังกะตามซ่าง

ทุกคนหวังเพิงได้   ใจกว้างปานทะเล  ซั้นแหล่ว  พี่น้องเอย 

 

20.  ผู้นำที่ดีนั้น  ต้องดีจากข้างใน

คือใจดีเว้าดี  มีศีลธรรมนำหน้า  

เว้าจาเป็นน้ำอ้อย  ออยเป็นบ่อวดเก่ง

ซุ้มเสียงเว้านุ่มนิ่ม  ยิ้มรับได้บ่ฮ้ายไผ

มีวิสัยทัศน์กว้าง  วางหมากเกมแก้เก่ง

หมั่นเที่ยงแต่ละก้าว  พาชาวบ้านฮ่างมี  ซั้นแหล่ว  พี่น้องเอย

 

21.  การเมืองกับการมุ้ง  ยุ่งคือกันนั่นละท่าน

มีการบ้านคู่มื้อ  คือด้ามกะดั่งกัน

แต่ว่าการเมืองนั้น  พัวพันกับผู้อื่น

เว็นคืนต้องเมื่อยม้อย  คอยรับใช้บริการ

ส่วนว่าการบ้านนั้น  ม่วนมันเมิดเมื่อย

มิดมับม้อย  มายม้างม่ายหนี  ซั้นแหล่ว  พี่น้องเอย

 

22.  รัฐธรรมนูญบ่เข้าขั้น  ให่ฝันเอาสาก่อน

 ตอนปืนเป็นขี่เหมี่ยง     ค่อยเถียงสู้ซ่อยกัน  พี่น้องเอย

 

23.  รัฐบาลใด๋เฮ็ดให่  บ้านเมืองเฮาเฮืองฮูง

ชักจูงหมู่อ้ายน้อง  ฮ่างมีขึ้นอยู่สำบาย

รัฐบาลนั่นละใช่   ประชาธิปไตยหรือบ่

ขอให้เลือกอยู่ข้าง  ทางหมู่เจ้าสิสำบาย   พี่น้องเอย

 

24.

 

 

 

 

 

 

 

 

 

(ยังมีต่อ)