อบายมุข(ผญา)

……………………………………………………

-ซื้อหวยนำพระให่       เสียสะซายหลายพันหมื่น

ฝันสู่คืนซื้อสู่งวด           เมิดเงินแล้วส่ำกัน พี่น้องเอย

-การพนันนั้น                แบ่งเงินกันบแล้วจักเทือ

สิเมือเฮือนกะบ่ได้        หมู่เพินให่นั่งถ่าเอา  พี่น้องเอย

-เล่นมวยตู้                   อย่าเชียร์ดังหมู่สิตื่น

คนข่างบ้านสิฮ้าย         ตำรวจบ้านเพินสิมา  พี่น้องเอย

-คันแม่นเล่นโบกไพ่         ตำรวจมาอย่าได้แล่น

แม่นสิหนีตำรวจได้           มันบ่คุ้มค่าปัว  พี่น้องเอย

-ยามเมาเหล่า                  เห็นภูเขาท่อจอมปลวก

เห็นช้างท่อหมาน้อย       เห็นแมงหิ่งห้อยท่อกระบุง  พี่น้องเอย

-เล่นไก่นั้น                    โฮแซวม่วนซืน

กลืนน้ำลายเมิดมื้อ       ลืมข้าวน้ำจนทองโพง  พี่น้องเอย

-เล่นมวยนั้น                 ให่เล่นใหญ่ก้าวกึง

เล่นไก่สูงเดือยยาว       สิได้เงินเมียย้อง  พี่น้องเอย

-โบกแม่ใหญ่เหี่ยน         เซียนเปิดเห็นว่าเป็นคู่

ยาดกันแทงจนอั้นตู้       พอเปิดขึ่นผัดดำเดียว พี่น้องเอย

-การพนันนี้                      มีได้เสียกับเมียด่า

การค้าขายมีแต่ได้        กำไรล้นหลั่งนอง พี่น้องเอย

-ไฟไหม่บ้าน                    ยังเหลือดินพอได้อยู่

การพนันลุกไหม้            เมิดเกลี้ยงฮอดขี่ดิน  พี่น้องเอย

-บุญบ่เคยทำไว้                โชคบ่มีอย่าได้อ่าว

แม่นเฮาถืกหวยแล้ว         เจ้ามือเจ้งบ่จ่ายเฮา  ซั้นแหล่ว

-หาเงินได้                        ทำบุญเอาไว้แน

ลางเทือตายข่อหล่อ     ยังพอได้ซอยซู  ซั้นแหล่ว

-ยามเมาเหล่า                  เห็นภูเขาท่อจอมปลวก

เห็นช้างท่อหมาน้อย         เห็นแมงหิ่งห่อยท่อกระบุง  ซั้นแหล่ว

-สูบยาควันสิเข่า               ปอดเฮาสิเหม็นเน่า

โรคมะเร็งสิแล่นเข่า                     บ่ทันเถ่ากะเลาตาย  ซั้นแหล่ว

-นกกระโดกฮ้อง               ถุงอนามัยใช้ง่าย

แต่ป้องกันเอดส์ได้          คันแม่นใช้ถืกวิธี  หลานเอย

-อย่าสิมัวเมาเล่น              พนันบอลต่างประเทศ

มันสิเกิดเหตุฮ้อน             ตอนเจ้าหนี่ไล่ทวง   หลานเอย

-คันแม่นเล่นพนันได้         ให้ซื้อของเอาไว้โลด

คันอยากเล่นเทือหน่า       หาเงินได้จังค่อยไป  หลานเอย

-รวยย้อนเล่น                   เห็นผู้ใดบอกแน่

เห็นแต่ได้มื้อนี้                            มื้ออื่นเกลี้ยงบ่ยัง  หลานเอย

-ไก่ตีซ้อมหน่อย                สิเมิดแฮงขาสั่น

บ่ทันครบยกแพ้                   เดิมพันเจ้าสิเหล่าสูญ  ซั้นแหล่ว

-ไก่เจ้าของน้อย                อย่าอวดดีตีโต๋ใหญ่

บาดทียามไก่แพ้               เมียฮ้ายจ่มบ่เซา พี่นองเอย

-เห็นไก่ตีเป้งเป้ง               อย่าฟ้าวต่อไวหลาย

ลางเทือเป็นไก่งาน           สิเสียเงินทั้งเสียเส้น  ซั้นแหล่ว พี่น้องเอย

-เล่นไก่เป็นต่อแล้ว            คันต่อหลายรองไว้แน

ลางเทือมันพลิกแพ้           ได้สองข่างสวยปานดาว  ซั้นแหล่ว

-ไก่อายุหน่อย                   อย่าอวดดีตีไก่แก่

ตีไปโดนสิพลิกแพ้          เงินเจ้าสิเล่าสูญ  ซั้นแหล่ว

-ไก่ตีซ้อมหน่อย                ยามตีแข้งขาสั่น

การบ้านซ้อมหน่อย           เมียป้อยจ่มบ่เซา  ซั้นแหล่ว

-เล่นไก่ตีเอาแค่ได้            เล่นได้โดนเป็นเซียนใหญ่

เล่นไก่ตีเอารวย             เล่นบ่โดนสิเซาเล่น ซั้นแหล่ว

-เล่นไก่นั้น                       เบิ่งแผลตีให่ถ่วนถี่

ตีตาหูล้วนล้วน                จั่งควรเล่นต่อยาว   ซั้นแหล่ว

-เล่นไก่นั้น                       โฮแซวม่วนซืน

กลืนน้ำลายเมิ้ดมื้อ          ลืมข้าวน้ำจนท้องโพง  ซั้นแหล่ว

-เป็นนักมวยซ้อมหน่อย      ถอยตีพอได้ค่า

แพ้ลงมาป่วยไข่       ไปเข้าส้วมกะได้คลาน  ซั้นแหล่ว

-นักมวยบ่มีค่าย               เก่งส่ำใด๋อย่าฟ้าวว่า

ฮอดยกสี่ยกห่า             ขาสั่นแพ้ออกอาการ  ซั้นแหล่ว

-เล่นมวยนั้น                    ให่เล่นใหญ่ก้าวกึ๋ง

เล่นไก่สูงเดือยยาว            สิได้เงินเมียย้อง …ซั้นแหล่ว

-เล่นมวยนั้น                    กรรมการใหญ่กว่าหมู่

คันชูมือผู้ใดนั้น             ชนะแท้แน่นอน  พี่น้องเอย

-เสียงโบกดังกะแล็บ         คีกแน่นอนอย่าฟ้าวว่า

มาล้วนดำกะย่อมได้       ไผลงคีกเจ้ามือกิน….. เถ่าเอย

-ไฮโลว์ตู้สาเตี้ย                ฝัดแฮงเป็นตาหน่าย

ตายต่ำอยู่เคิงมื้อ         เงินขายข้าวจนบ่ยัง….. พี่น้องเอย

-โบกแม่ใหญ่เหี่ยน            เซียนเปิดเห็นว่าเป็นคู่

ยาดกันแทงจนอั้นตู้          พอเปิดขึ่นผัดดำเดียว…..พี่น้องเอย

-การพนันนี่                      มีได้เสียกับเมียด่า

ค้าขายมีลุบได้        ฮ้องไห่มีน้ำตา หลานเอย

-เสพยาบ้า                       สูบกัญชาสูบฝิ่น

กินต้มไก่แก้มเหล่า     เมาแล้วเป็นหมู่หมา  หลานเอย

-บ่มีไผรวยย้อน                 การพนันเบี้ยโบก

ยามโชคดีขี่ถืกหม่อง      ยามโชคร้ายเหยียบขี่เจ้าของ  หลานเอย

-เล่นไก่ตีโฮตึ้งตึ้ง              เล่นไฮโลโสกันม่วน

เล่นโบกหัวยุ้มย้าม        ตำรวจเอิ้นแล่นโสตาย ซั้นแหล่ว พี่น้องเอย