กลอนลำลาเกษียณอายุราชการ

พ่อครูผู้เขียนกลอนลำไม่ใช่หมอลำ  ผู้เป็นหมอลำจึงต้องปรับแต่งก่อนลำครับพี่น้องครับ

………………………………………

กลอนที่  1

ครูเกษียณลำลาด้วยตัวเอง

……………………………………..

กลอนลำลาเกษียณอายุราชการ

ทำนองลำยาว/ลำล่อง

โอ่ โอ ละนอ ๆ…………..นอ    

มาบัดนี้สิได้ลาพี่น้อง  ที่มางานทุกท่าน

ผู้มางานมื้อนี้  ขอลาแล้วคู่สู่คน

ขออภัยเหลือล้น  สิ่งบ่ดีที่เคยก่อ

บ่ตั้งใจหรือไม่  อภัยด้วยคู่สู่อัน

อย่าลืมกันเด้อพี่น้อง  มีเงินทองแบ่งปันแน

อย่าลืมแวเยี่ยมบ้าง  ยามว่างคู่สู่คน

อ้ายยังจนบ่เลิกแล้ว  แนวคนจนใจใหญ่

มีแต่แนวอยากได้  เงินซื้อบ่พอ

ได้แต่ขอเซ็นไว้  ปลายเดือนจั่งได้จ่าย    

คันแม่นไปเยี่ยมอ้าย  สิปันยิ้มให้คู่คน

ขอบพระคุณอย่างเหลือล้น  ที่จัดงานเลี้ยงส่ง

บอกตามตรงว่าอ้าย   ดีใจล้นได้ม่วนยิน

ประทับใจทุกสิ่งสิ้น  งานบ่บิ่นสมบูรณ์ดี

วงดนตรีกะม่วนมัน   อาหารหลายเหลือล้น

เสียงดนตรีกะดังห่าว   บ่าวสาวเต้นอร่อย

หางเครื่องสาวส่ำน้อย  พาเต้นม่วนมัน

ขอบพระคุณทุกท่าน  หลาย ๆ อีกล้านเทือ

คันเจ้าเมือฮอดบ้าน  ให้หมานได้ดังฝัน

การงานให้ก้าวหน้า  การเงินกะให้คล่อง  

การทองกะให้ได้   การบ้านให้ม่วนมัน

การอันใดกะให้ได้  สมดังมะโนหมาย

สุขสำบายปานพระยา  อยู่ดีอย่ามีฮ้อน

ให้ได้พรพระอินทร์เจ้า  ร้อยซาวปีบ่เถ่าแก่

ดูแลกันคืออ้ายน้อง  ฮักแพงมั่นบ่หน่ายกัน

ให้สุขสันต์ซาบซ่า  สารพันม่วนซื่น

อายุยืนฮอดร้อย  ห้าสิบถ้วนคู่สู่คน

ความทุกข์จนบ่มาใกล้  อันตรายบ่มาผ่า

ให้สุขสันต์ซาบซ่า   ซัมซิ่งได้คู่คืน ได้คู่คืน……..เด้อ 

ต่อด้วยลำเต้ย

เอ้าลา ๆ ๆ ๆ ๆ     เอ้าลา ๆ ๆ ๆ ๆ

ข้อยขอลาไปในวันเกษียณ    ขอลาออกจากโรงเรียน

ขอลาออกจากโรงเรียน      ถึงวันเกษียณจำต้องลาจร

สุดแสนอาวรณ์ที่ต้องจากไป  สุดแสนอาลัยอาวรณ์โรงเรียน

ข้อยเกษียณไปแล้ว  บ่มีแนวสิคึดต่อ

ได้แต่รอคอยหมู่อยู่บ้าน  คันฝันพ้อกะแม่นบุญ

ขอบคุณพี่น้องทั้งหลาย   ขอบคุณพี่น้องทั้งหลาย

ที่มีน้ำใจเลี้ยงส่งเกษียณ  สัญญาว่าจะมาเยี่ยมเยียน

สัญญาว่าจะมาเยี่ยมเยียน  คำว่าเกษียณเป็นเพียงคำลา

คำว่าขอลาเป็นเพียงคำลวง คำว่าห่วงหวงเป็นเพียงเอาใจ

ไผมีงานอย่าลืมเอิ้น  ไผมีเงินให้ข้อยยืมแน่

กินดองอย่าลืมแวบอกด้วย  สิไปช่วยซ่อยสู่งาน

ขออภัย ทุกท่าน   ที่เคยพาลผิดใจหมู่

เคยหูลูเคียดพุ้นเคียดพี้  เคยเป็นหนี้ใช้แต่ทุน

มีบุญบอกเด้อพี่น้อง  มีซองแจกให้ข้อยแน่

เหรียญบาทข้อยหลายแท้ ๆ  แท้ ๆ ๆ ๆ ๆ      พอได้แหย่ป่อนใส่ซอง

จากใจของคนลาจร  จากใจของคนลาจร

กราบไหว้วิงวอนเหล่าเทพเทวา  โปรดช่วยปกปักรักษา

โปรดช่วยปกปักรักษา    พี่น้องที่มาให้สุขสบาย

หายเจ็บหายไข้โรคภัยไม่มี  อยู่แดงมีฮีอยู่ดีมีแฮง

ให้เจ้าแข็งแฮงด้วย    หล่อสวยใสเป็นวัยละอ่อน

นอนอยู่ใสให้เจ้ามีคู่ซ้อน  คู่ซ้อน ๆ ๆ นอนกลิ้งแม่นกล่อมสอง

ฮักประครองกันไว้   ไปนานโดนจนฮอดเถ่าฮอดแก่

ดูแลกันจนกว่าฮอดมื้อ   มายม้างมุ่นสังขาร

ขอให้ฝัน  ของเจ้า    เป็นจริงได้ทุกสิ่งอย่าง

ย่างไปใสมีแต่คนแห่อ้อม     รักษาเจ้าให้อยู่ดี

ให้เจ้ามีเป็นได้   สมหัวใจเจ้าทุกสิ่งอย่าง

สุขสมหวังดังที่เจ้าวาดไว้   เศรษฐีได้เป็นดังฝัน

อายุยืน ยาวมั่น   หลายพันปีบ่เถ่าบ่แก่

ฮูปหล่อสวยใสงามแพ้แว้  แพ้แว้  ๆ ๆ ๆ

สมใจแท้แม่นคู่อัน   นั่นละนานางนา

อย่าหลงอย่าลืมกันเด้อ  อย่าป๊ะอย่าไลกันเด้อ เออ…

………………………………..

กลอนที่  2

เพื่อนครูลำส่งผูู้เกษียณ

………………………………..

โอ่ โอ ละนอ ๆ…………..นอ    

มาบัดนี้สิได้ลำส่งอ้าย   ผู้เกษียณไปหวั่งวัง

บ่หันหลังส่องหน้า   เพินลาแล้วบ่ต่าวคืน

ก่อนเคยยืนเคียงข้าง   สางงานซ่อยกันม่วน

ชวนกันติวเด็กน้อย   แข่งนี้นั้นคู่สู่ปี

นักเรียนดีเก่งได้   รางวัลยามขันแข่ง

พี่คำแพงเป็นหลักให้  พาไปสู้คู่สนาม

ยามมีงานชุมชนนั้น  กะซ่อยกันเสริมส่ง

ตามตกลงกันไว้   บ่ไลถิ่มซ่อยกัน

ยามมีภัยฮ่วมกันต้าน  ยามมีงานหุ่มกันซ่อย

หุ่มจอยกินนี่นั้น  ยามว่างได้ม่วนยิน

พี่สิเกษียณสิ้น….  บินหนีไปจากหมู่

ถิ่มงานครูไปอยู่บ้าน  ใจสะท้านหวั่นไหว

ยามมีภัยมาหุ่ม  ไผเด้.นอสิมาซ่อย

ไผสิสอนเด็กน้อย  ซ่อยหมู่ข้อยดังเดิม

ไผสิเติมเต็มให้  กำลังใจคือเจ้าอยู่

ไผสิเป็นหมู่ข้อย  ยามผอ.เอิ้นสั่งงาน

ไผสิหารนำข้อย  ยามมีงานไทยบ้านแผ่

นับตั้งแต่มื้อนี้  บ่มีเจ้าอยู่จั่งใด๋

เจ้าเกษียณไปแล้ว  อย่าลืมแจวมาเยี่ยมส่อง  แนเด้อ

หันมามองเบิ่งหมู่ข้อย  ผู้คอยมื้อได้เกษียณ

ผู้ยังวนเวียนสู้  ยังเป็นครูอยู่หม่องเก่า

ผู้หวังยืนฮอดเถ่า   เป็นหมู่เจ้าดังเดิม

หมู่ครูได้ริเริ่ม  จัดงานเสริมเลี้ยงส่ง

ส่งทางลงให้เจ้า  เมือเซายั้งอยู่เฮือน

ถิ่มเงินเดือนเมือบ้าน  รับบำนาญพอใช้จ่าย

ใช้ชีวิตอยู่บ้าน   สุขล้นม่วนหลาย

บ่มีนายมาขัดข้อง   บ่มีหมองมัวหม่น

บ่มีคนห้ามฮ้าย   เฮ็ดหยังกะได้ดั่งใจ

ขออภัยหากน้องได้  ล่วงล้ำก้ำเกินพี่

ทำบ่ดีต่ออ้าย  อภัยให้อย่าสิไล

น้องขออวยพรให้  ชัยโยสิทธิโชค

โฉลกดีขี่ถืกหม่อง  เงินทองล้นหลั่งโฮม

ให้สมหวังคู่ด้าน  เงินงานการหน้าที่

สิ่งใดดีให้หลั่งเข้า  สิ่งใดฮ้ายให่หลั่งหนี

เป็นเศรษฐีพันล้าน   สุขสำราญม่วนชื่น

อายุยืนฮอดร้อย   ห้าสิบแล้วจั่งค่อยไป   เด้อ…เออ

ต่อด้วยลำเต้ย

เกษียณเป็นคำอำลา  ๆ     ข้าราชการต้องได้เจอะเจอ

เกษียณเวียนมาเสมอ    เกษียณเวียนมาเสมอ

เมื่อมาเจอะเจอก็ต้องจากจร สุดแสนอาวรณ์อาลัยพี่เรา

เป็นวันสุดเหงาที่ต้องจากกัน   สุดแสนรำพันรำเพยรำพึง

ถึงเกษียณไปแล้ว  เป็นแนวใดให่พี่ส่งข่าว

น้องสิรอคอยเยี่ยมจากเจ้า  จากเจ้า จากเจ้า จากเจ้า

อยากจาเว้าแม่นต่อกัน    มีเรื่องสำคัญอยากถามด้วย

อยากซื้อหวยงวดนี้   มีโตดีบอกให้น้องแน่

มันสิออกโตใดเท้แท้   แท้แท้  แท้แท้ แท้แท้

แวบอกน้องอย่าสิอำ   น้องสินำหาซื้อ

ถือมาไว้ฟังข่าว   ออกเลขเฮาสิฉลองไก่ต้ม

ไก่ต้ม ไก่ต้ม ไก่ต้ม  กลมแบนพร้อมให้ม่วนมัน

สุขสันต์เด้อครับคุณพี่   โชคดีเด้อครับอ้ายท่าน

โชคหมานในทุก ๆ เรื่อง  บ่เคืองข้องคู่สู่อัน

ให้ความฝันของอ้าย  เป็นจริงได้ทุกสิ่งอย่าง

ย่างไปใสให้เจ้าได้พบพ้อ  ห่อคำแก้วและห่อเงิน

ให้เจ้าเพลินนำได้   มีเป็นเช่นที่ฝันใฝ่

อันตรายบ่มีมากลายใกล้  ๆ ๆ ๆ    ภัยฮ้ายอย่าสิมี

เป็นเศรษฐีพันล้าน   งานบ่มีเงินให้ไหลหลั่ง

เข้ากระเป๋าเจ้าบ่มีมื้อว่าง  มื้อว่าง มื้อว่าง มื้อว่าง  ร่างกายเจ้าให้อ่อนแข็ง

แฮงกะหลายปานช้าง   งัดง้างหยังได้โดยงาย

สุขสำบายปานได้ขึ้นชั้นฟ้า   ชั้นฟ้า ชั้นฟ้า ชั้นฟ้า  ปราถนาเจ้าได้คู่อัน

นั่นละนาอ้ายนา  อย่าลืมมาเยี่ยมเด้อ  อย่าหลงอย่าลืมน้องครูเด้อ เออ