การสอบ O-NET (กลอนอีสาน/ผญา)

เขียนตามคำขอ ปรับแต่งใช้ตามใจชอบนะครับ

……………………………….

กลอนที่ 1

การสอบ  O-NET

…………………………….

O-NET เป็นชื่อชั้น  การสอบทันสมัย

สอบในเดือนกุมภา  ทุกปีให่จำไว้

เดือนมีนาประกาศให่  เฮาทั้งหลายได้เบิ่ง

คะแนนเถิงสอบผ่านได้  หรือตายก้องด้องอยู่ฮู

ผลงานครูสอนไว้   พอส่ำใดส่ำหนึ่ง

หรือสอนถึงเด็กน้อยได้  ประกาศให่ฮู้ทั่วกัน

บางเขตการศึกษานั้น  ให่ความสำคัญอย่างใหญ่

โรงเรียนใดสอบได้   ที่หนึ่งให่ได้เป็นผล  

ครูทุกคนได้สองขั้น ฉลองกันอย่างยิ่งใหญ่

ตามกฏเกณฑ์ที่วางไว้  บอกให่ฮู้ทั่วกัน

สอบชั้นใดสิบอกให่  ได้แก่ ป.6 และ ม.3

กับทั้งชั้น ม.6   สายสามัญท่อนั้น

วิชาการที่สอบนั้น  มีนำกันแปดกลุ่ม

เป็นชุมนุมวิชายาก   ลำบากแท้ต้องท่องจำ

ภาษาไทยนำหน้า  สังคมมาให่ยุ่งยาก

อังกฤษจากฝรั่งพุ้น  ยังมาจุ้นให่ปวดหัว  

คณิต วิทย์ ชัวร์ต้องจำได้   และเข้าใจจั่งสอบผ่าน

การงานอาชีพพร้อม  เทคโนโลยี่นี้ยากหลาย

เฮียนสำบายแต่สอบยาก  สุขะพละศึกษา

ศิลปะกะยากหลาย  ให่เตรียมการอ่านให้พร้อม

อย่าสิยอมก่อนสู้   ครูเพินสอนให่จำจื่อ

เฮามีมือมีหัวต้องสอบได้  คันใจสู้บ่ถอย

โรงเรียนทั้งใหญ่น้อย  ที่แข่งขันฟันฝ่า

ต้องหางบเป็นน้ำจิ้ม  แม่พิมพ์ให้ตั้งใจติว 

ผลการสอบสิโลดลิ่ว  โรงเรียนเฮาสิโดดเด่น

ได้ทอปเท็นคักแท้   ซินแสท้วงกล่าวทวย  น้องครูเอย

 

……………………………….

กลอนที่ 2

การสอบ N t

…………………………….

N t  เป็นชื่อชั้น  การสอบเพื่อวัดผล

ของคนเฮียนชั้นป. 3   ว่าเก่งดีส่ำใดแล้ว

เพื่อเป็นแนวทางให่  ได้ข่อมูลไปคึดต่อ

แล้วก่องานใหม่ขึ่น  ให่ก้าวหน่าดีกว่าเดิม

สพฐ.เพินได้เริ่ม   เติมเต็มสิ่งที่ขาด

หวังนักเรียนฉลาดขึ่น  เก่งดีได้กว่าแต่หลัง

เปลี่ยนหลักสูตรแต่ละครั้ง  หวังให่ดีหวังให่เก่ง

เล็งไว้สูงสุดขอบฟ้า  แต่คาค้างอยู่หว่างครู

ผู้ที่สอนเด็กน้อย  ในโรงเรียนทุกหนแห่ง 

สิเข้มแข็งพอหรือไม่  มีใจสู่ส่ำใด

งานครูหลายล้นหรือไม่  กำลังใจครูดีบ่

ครูพออยู่พอกินหรือไม่  ลำบากแท้ส่ำใด๋

เฮ็ดจั่งใดจั่งสิให่  ครูตั้งใจสอนเต็มที่

ปัญหามีมากล้น   คนแก้อยู่กระทรวง  พี่น้องเอย