บทเจรจาขึ้นบ้านใหม่
มีนาคม 6, 2022มันคือแป้ง
เมษายน 7, 2022…………………..
กลอนที่ 1
…………………
บุญคุณของพ่อแม่
บุญคุณพ่อแม่นั้น ทะเลหลวงกะบ่ส่ำ
ท้องฟ้าเพินว่ากว้าง บ่เคิงเสี่ยวพ่อแม่เฮา
แม่นสิเอาแผ่นฟ้า แทนกระดาษวาดขีดเขียน
น้ำทะเลแทนน้ำหมึก ใส่ปากกาเขียนคำเว้า
เขียนบรรยายจนฮอดเถ่า เว้าบุญคุณกะบ่ทั่ว
ยกใส่หัวยอใส่เกล้า พ่อแม่เฮานั้นจั่งค้ำคูณ พี่น้องเอย
…………………………..
กลอนที่ 2
………………………
บุญคุณของพ่อแม่
บุญคุณพ่อแม่นั้น หนักเกิงธรณี
ไผผู้ยอแยงพบ จั่งสิเฮืองเมือหน่า
ไผผู้วาจาต้าน ให่สองเขือน้ำตาหลั่ง
บาปท่อฟ้า เวรนั้นท่อแผ่นดิน
ไผผู้ทำการส่าง ตั้งต่อแทนคุณ
สืบสกุลโคตรแนว ให่แผ่พืนไปหน่า
บุญสิพาส่งให่ สุขสำบายม่วนซืน
อายุยืนฮอดร้อย เงินคำแก้วกะหลั่งโฮม พี่น้องเอย
…………………..
กลอนที่ 3
…………………..
บุญคุณของแม่
บุญคุณของแม่นั้น ยิ่งใหญ่มหาศาล
บ่อาจหาญทดแทน ให่เมิดแปนไปได้
เงินที่ไปเช่าท้อง ของแม่เฮาตอนเกิดใหม่
ค่าแลงงายข้าวน้ำ กะเซ็นค้างอย่างเดียว
เงินค่าเทียวพาไปให้ หมออนามัยเพิ่นตรวจเบิง
เงินค่ายาขี่เผิ่งยานี่นั่น จั่งแม่นหลาย
คันสิสาธยายเว้า หนี่ของเฮาตอนอยู่ท้องแม่
จั่งแม่นหลายคักแท้ บุญคุณแม่นับบ่ไหว พี่น้องเอย
…………………..
กลอนที่ 4
……………….
บุญคุณของแม่
บุญคุณของแม่นั้น ยิ่งใหญ่มหาศาล
มากเกินการสิเว้าเถิง ในเทือเดียวให้เมิดได้
เงินที่ไปเช่าท้อง ของแม่เฮากะยังบ่จ่าย
ค่าแลงงายค่าข้าวน้ำ กะเซ็นไว้บ่ใช้เลย
ทำเป็นเฉยเหนียวหนี้ มีบ่มีกะบ่เอ่ย
ยังบ่เคยใช้หนี้ เซ็นค้างตั้งว่าดน
จนฮอดแก่ฮอดเถ่า อยู่กินเซ็นบ่เคยจ่าย
สาธยายเฉพาะหนี้อยู่ท้อง เมิดมื้อแล้วบ่เป็น พี่น้องเอย
…………………..
กลอนที่ 5
……………….
ความในใจของแม่
เงินค่าเช่าท้อง แม่บ่เอาดอกคำแพง
อย่าละแวงแม่สิทวง เอาดอกดวงนำเจ้า
เงินค่าเช่านั้นนี่ ถึงลูกมีกะบ่ต้องจ่าย
ค่าแลงงายข้าว น้ำ แม่จ่ายแล้วบ่ต้องแชร์
ค่าแม่ดูแลเลี้ยง จนลูกใหญ่ในครรภ์
แม่บ่ผันเป็นเงิน ตั้งแต่เดิมโดยเค้า
หวังเดียวคือให้เจ้า เป็นคนดีคือหมู่เพิน
บ่เอาเงินค่าเลี้ยง แม่จ่ายแล้วบ่ต้องคืน ลูกเอย