ผญาสอนหลาน

……………………….

ผญาสอนหลาน

………………………

• คันชีวิตของเจ้า  ตกต่ำฮอดก้นหลุม

อย่าสิก่นดินลง  มันสิฝังโตเจ้า

ให่เจ้าก่นทางขึ่น  เหยียบยืนปีนป่าย

จั่งสิขึ่นจากหลุมได้  ให่จื่อไว้ฮอดมื้อตาย หลานเอย

• กบกะลานั้น   มันคึดว่ามันใหญ่คัก

โตเองเป็นกบยักษ์   คับกะลาใหญ่สุดแล้ว

แนวบ่เคยเห็นฟ้า   เห็นแต่กะลาว่ากว้างใหญ่

ต่อมื้อออกจากกะลาได้  จั่งได้ฮู้หยังเป็นหยัง หลานเอย 

• แหนงไม้ไผ่น้อย  จ่อยบางหักกะง่าย

คันหลายแหนงมัดโฮมกัน  สิหมั่นแข็งหักบ่ได้

คนเฮานั้น   กะคือกันบ่แตกต่าง

สามัคคีบ่แตกม้าง   ไผงัดง้างกะบ่ติง  หลานเอย

• ให่ถือศีลสัตย์ไว้  ได้เงินเหี่ยให่คืนเขา

อย่าสิเอาเป็นของโต  แม่นหิวโซให่อดไว้

ไปทางหน่า   โชคชะตาสิเฮืองฮูง

เทพเบื้องสูงเพินฮับฮู้  สิอวยให่เจ้าโชคหมาน หลานเอย

• บุญคุณพ่อแม่นั้น     หนักเกิ่งธรณี

ไผผู้ยอแยงพบ     หากสิเฮืองไปหน่า

ไผผู้วาจาต้าน     ให่สองเขือน้ำตาหลั่ง

บาปท่อฟ้า      เวรนั้นท่อแผ่นดิน

หลานมีกินมีอยู่ย้อน   มีพ่อแม่พาหา

มีพ่อแม่ให้เพิงพา   ตั้งแต่เนาว์อยู่ในท้อง

มีพ่อแม่คอยปกป้อง  แต่เกิดมาจนเติบใหญ่

หลานมีเป็นนั้นนี่ได้    ย้อนพ่อแม่ให้ซอยหนุน

หลานยังเป็นวัยรุ่น   พวมคะนองขึ่นใหม่

พ่อแม่หวังได้เพิงเจ้า    ยามเถ่าได้ซอยแฮง

เถิงยามแลงอย่าไปเล่น   แซะซำแต่นำหมู่

ครูเพิ่นให่การบ้าน     ให่หลานฟ้าวเฮ็ดส่งครู

หมู่พวกนั้น      ชั่วกะมีดีกะมาก

จักสิเพิงได้บ่ได้   ไปหน่าจั่งสิเห็น

ให่หลานคอยหลีกเว้น    หมู่พวกพาหนีเฮียน

บ่เพียรอ่านหนังสือ     โทรเอิ้นหาพาไปเล่น

ยามกลางเว็นดมกาววื้น ยามกลางคืนหาลักไก่

เอาไปต้มแก้มเหล้า   เมาแล้วไล่ฆ่ากัน

มีเพศสัมพันธ์มั่ว    บ่มีผัวแต่มีลูก

หมู่พาทุกข์ยากไฮ้  มีหนึ่งให่คึดว่าหลาย

คันแม่นได้หมู่พวก  พาขีดเขียนเฮียนอ่าน

พาเฮาเฮ็ดการบ้าน   งานบ่ค้างส่งครู

ดูหนังสือยามว่าง    หาทางไปเฮียนต่อ

ได้พ้อหมู่จั่งสี้    มีเป็นร้อยกะแฮงดี

แต่ก่อนกี้    บ่อนถางไฮ่ไม้ยังหนา

บ่อนเฮ็ดนา    ที่ดินกะยังก้วง

ปูปลาบ่อึดอยาก   หาได้มาเทือละต่า

เอามาปันพี่น้อง     คนซื้อบ่มี

สู่มื้อนี้     บ่อนถางไฮ่ไม้บ่หนา

บ่อนเฮ็ดนา    ที่ดินกะเหลือหน่อย

แบ่งซอยขายเมิ้ดสิ้น   บ่มีดินว่างเปล่า

กบเขียดโลละร้อย    หาซื้อกะบ่มี

สู่มื้อนี้    ไผบ่เฮียนเขียนอ่าน

สิได้งานต่ำต้อย     เงินเดือนหน่อยใช้บ่พอ

เถ่าแก่เพิ่นบ่ง้อ     คนหางานมีมาก

มาจากลาวเขมรพม่า    ค่าแฮงถืกกว่าหมู่เฮา

หลานควรเอาใจตั้ง   เฮียนต่อให่มันสูง

ให่ได้เป็นนายเขา    หมู่ลาวเขมรพม่า

การศึกษาสิซอยให่     ได้งานดีมีตำแหน่ง

เงินเดือนแพงก้าวหน่า     พาเจ้าให้ฮ่างมี

กว่าสิดีกว่าสิได้นั้น     ต้องฟันฝ่าอุปสรรค

สิหนักเบาส่ำใด     ฝ่าฟันไปอย่าได้ท้อ

สาวสวยรออยู่ข้างหน้า    ผู้บ่าวเก่งดีทั้งรูปหร่อ

นั่งนอนรอถ่าหมู่เจ้า   หวังเข้าฮ่วมแต่งงาน

ให่หลานอดทนสู้      ฝ่าฟันอย่าได้หวั่น

คันแม่นเฮ็ดแม่นสร่าง   สิรวยขึ่นแน่นอน

ฟังคำสอนพ่อครูเว้า    นำเอาไปคึดต่อ เบิ่งแนเด้อ

บ่อนใดพอเฮ็ดได้     ปรับใช้ให่คล่องคือ..หลานเอย

 

…………………..

ผญาก้อม

สอนหลาน

………………….

1. เห็นผีบ้าถือมีด               ให่หลีกไกลไปให่ห่าง

ย่างนำทางพ้อหมาว้อ                 ให่แวลี้อย่าสิขวาง  หลานเอย

2. คันเกรงใจลูกน้อง           สิปกครองเขาลำบาก

เกรงใจคนรอบข่าง                      ทางข่างหน่ายุ่งแน่นอน  หลานเอย

3. ปีกยังบ่มีขนขึ่น              อย่าฟ้าวล่วงบินบน

คันยังจนเงินทอง           อย่าฟ้าวหองเอาเมียน้อย  หลานเอย

4. เห็นดาวเต็มท้องฟ้า        อย่าฟ้าวว่าบ่มีฝน

คันยังจนมีเมียสาว         อย่าเชื่อใจแม่เถ่า  หลานเอย

5. การยอมแพ้                   เป็นอุบายให้เติบใหญ่

คันเฮาตายมื้อนี้         สิใหญ่ได้บ่อนใด๋  หลานเอย

6. การยอมแพ้                   เป็นอุบายเอาโตรอด

ปลอดภัยไปมื้อนี้      มื้อหน่าค่อยว่ากัน  หลานเอย

7. อ่านหนังสือได้ความฮู้     ดูหนังได้มันม่วน

เอาเมียได้ลูกเต้า       กินข้าวได้อิ่มพี  หลานเอย

8. ยอมเสียเปรียบมื้อนี้       เพื่อมื้ออื่นมื้อฮือ

มื้อเฮามีมือตีน        เติบโตไปภายหน้า  หลานเอย

9. คันยังมีป่าไม้        ต้องหาฟืนได้คักแน่

คันชีวิตยังอยู่ยั้ง       เฮ็ดหยังกะได้หลากหลาย  หลานเอย

10. สายน้ำไหลอ่อนพลิ้ว      ซึมเซาะเก๊าะแก่ง

ภูเขาหินแข็งกระด้าง       ทลายล้มบ่ยัง  หลานเอย

11. คันให่เงินเสี่ยวใช้            สิได้คืนทั้งเงินเสี่ยว

คันให่เสี่ยวกู้ยืม             เสี่ยวสิหายทั้งเงินพร้อม  หลานเอย

12. ฮู้ว่าโตเป็นแหล่ง             อย่าฝอยหลายนายสิหน่าย

ให่สุภาพอ่อนน้อมไว้         นายสิจ้างให่อยู่นำ  หลานเอย

13. ศัตรูถอยอย่าไล่บี้           อย่าผลีผลามเป็นอันขาด

ความประมาทเป็นเหตุให้    ตายได้คู่ยาม  หลานเอย

14. เฮาได้หน่า         หมู่เขาเอิ้นว่าเสี่ย

แต่เสียเปรียบเขาสู่ด้าน      ประโยชน์ได้บ่อนใด  หลานเอย

15. คนอ่อนน้อม        ไปทางใดคนถามไถ่

มีคนฮักทั่วบ้าน        คนอยากฮู้ทั่วแผ่นดิน  หลานเอย

16. ชิงชังความชั่วฮ้าย           ต้องหมางใจกับผู้อื่น

ถ่าแม่นฝืนบ่ได้        ให้หนีหน่าอย่าใกล้มัน  หลานเอย

17. ชนะโตเองได้                  ประเสริฐศรีดีกว่าหมู่

ชนะผู้อื่นบ่กี่มื้อ         กลับเป็นแพ้พลิกผัน  หลานเอย

18. คันแม่นทำผิดหน่อย       สิสำเร็จดังหมาย

คันแม่นทำผิดหลาย      สิล้มเหลวไปเรื่อย  หลานเอย

19. คนสิเด่นดังได้                พวกผู้ใหญ่ต้องซอยดึง

พวกผู้น้อยต้องซอยดัน    เสี่ยวกันต้องซอยค้ำ  หลานเอย

20. ข่อใดดีนำมาใช้              ข่อใดเสียให่ถิ่มปล่อย

ปรับปรุงโตเทือละหน่อย    สิดีขึ้นบ่โดน  หลานเอย

21. มีหมู่ดีหนึ่งร้อย              หน่อยไปบ่พอป่น

มีศัตรูหนึ่งคน                 จั่งแม่นหลายเป็นตาย้าน  หลานเอย

22. หวานคำเว้า                   เมามายไข่บ่ส่วง

หวานน้ำเหล้า               เมาแล้วกะส่วงหาย  หลานเอย

23. สงบอารมณ์ได้               ภัยบ่มีดีคู่อย่าง

เคราะห์บ่เห็นเวรบ่ข่อง       มวลพี่น้องกะหุ่มหอม  หลานเอย

24. อย่าสงสารคนเจ้าเล่ห์     เสเพลเอาเปรียบหมู่

มันคืองูเห่าก้อม             มีพิษฮ้ายตอดตาย  หลานเอย

25. คันแม่นมีสติแล้ว             สตางค์หามาได้ง่าย

สตางค์หลายสติล่ม          สตางค์สิ้นคู่สตางค์  หลานเอย

26. แกล้งทำทีเป็นแพ้           ดีกับเขาไปสาก่อน

ตอนหลังเฮาจั่งเมี้ยน                   คันยังแค้นบ่หาย  หลานเอย

27. ย้องให่มันแล่นเล่น         ชกลมไปสาก่อน

ตอนที่มันเมื่อยล้า        จั่งค่อยเมี้ยนแม่มัน  หลานเอย

28. เก็บอารมณ์เอาไว้           ในใจอย่าให่โผล่

ทำเป็นโง่บ่ฮู้เรื่อง              ยิ้มเข่าไว้สิดีเอง  หลานเอย

29. อย่าสิหลงคารมณ์ย้อง    เป็นนายค้ำประกันเขา

มันสิคาคอเฮา         ยามเขาหนีศาลเอิ้น  หลานเอย

30. ทุกข์ยากย้อน        เป็นคนดีเขาให่ซ่อย

เดิ้กดื่นลุกนั่งป้อย     เป็นลูกหนี่บ่ได้ยืม  หลานเอย

31. หินแตกแล้ว          บ่คงคืนคือเก่า

ดินที่มุ่นแตกม้าง    ยังคืนได้ดังเดิม  หลานเอย

32. แก้วแตกร้าว       บ่คงคืนคือเก่า

ใจที่มุ่นแตกม้าง      ผสานได้กะบ่โดน  หลานเอย

33. มีความแค้น       ให่ทำลืมสาก่อน

ไปแก้แค้นชาติหน่า      กะยังได้บ่สาย  หลานเอย

34. ชนะเมิดทุกเรื่อง             สิเคืองตาผู้แนมเบิ่ง

ยอมแพ้เรื่องเล็กน้อย       เรื่องใหญ่นั้นจั่งค่อยเอา  หลานเอย

35. ฟังให่หลายเว้าหน่อย     หน่าหงึกหงักแนจั๊กนอย

ให่เพินฝอยเพินเว้า         เฮาเอาซิ้นต่อนมัน  หลานเอย

36. อย่าเปิดใจให่คนฮู้          ความในใจปิดไว้แน

ตีแผ่เสียทุกเรื่อง            หมาจอกเถ่าสิเห่าหอน  หลานเอย

37. ขี่ถี่หลายหมู่หนีหน่า       หาซุมแซวหม่องใหม่

เซอะหลายเงินทองสิ้น       หมู่กินถิ่มดังเดิม  หลานเอย

38. คันหูหนวกเป็นบางครั้ง    ใบ้บอดบางเวลา

สินำพาเฮาหนี               พ้นภัยทั้งผองได้  หลานเอย

39. ทนให่เขางอยบ่าขึ่น        ยืนสูงไปสาก่อน

ตอนหลังเฮาจั่งขึ่น          ยืนสูงได้ดั่งกัน  หลานเอย

40. คันแม่นตายไปแล้ว         บ่มีแนวสิคึดต่อ

มันก็สุ้ดจุดปุด            ปานจ๊กครกแน่นนอน  หลานเอย

41. คนหัวปู้                         ดูหนังสือบ่ยอมห่าง

ว่างมื้อใดอ่านมื้อนั้น       เฮียนเก่งได้ส่ำหัวดี  หลานเอย

42. หัวดีแล้ว          หนังสือกะบ่อ่าน

การบ้านบ่ส่งพร้อม      คันสอบได้ให่ขี่หลัง  หลานเอย

43. มีหมู่ดีแล้ว                     ฮั้วบ่มีกะตามซ่าง

ศัตรูมาหมู่อ้อมข่าง     ศัตรูย้านแล่นหนี  หลานเอย

44. ยามอยากกู้                   ดอกท่อใดกะบ่เกี่ยง

บาดเถิงยามชดใช้       เงินต้นกะว่าแพง  หลานเอย

45. หวังให่สูงสุดไว้               เพียรไปให่มันฮอด

แม่นสิจอดบ่ฮอดหม่อง       ได้เคิงเสี่ยวกะว่าดี  หลานเอย

46. คันบ่ตายด่าวดิ้น            แผ่นดินยังพอได้ย่าง

ลมหายใจยังอยู่ยั้ง         ความหวังนั้นอย่าสิเซา  หลานเอย

47. ขี่ย้านล่วงหน้า               กล้าโพดเหลือปานเสือใหญ่

ทั้งสองอย่างใช้บ่ได้        ให่ไลถิ่มอย่ากระทำ  หลานเอย

48. คันเขาติเตียนต้าน          ให่ตรวจตราตนเบิ่ง

เอาคำติ๊เซิงหม่อง        มาตั้งต้นแต่งโต  หลานเอย

49. คันเฮาเป็นผู้ให่               สิภูมิใจได้ซอยหมู่

เป็นผู้ขอผู้กู้             หมู่ซังฮ้ายหน่ายแหนง หลานเอย

50. นอนหัวค่ำตื่นเช้า           เฮ็ดให่เฮาสดชื่น

อายุยืนฉลาดล้ำ        เงินคำแก้วกะหลั่งโฮม หลานเอย

51. ยามเมื่อเฮาทุกข์ยาก      ลำบากสุดชีวิต

พิศูจน์น้ำใจมิตร           เสี่ยวสหายเมียแก้ว ซั่นแหล่ว หลานเอย

52. ยามเฮาเจ็บป่วยไข้          ไปนอนอยู่โรงบาล

พิศูจน์ใจบริวาร         พี่น้องเฮาทั้งค่าย หลานเอย

53. จงรักษาความถืกต้องไว้  ให่คงอยู่ยืนยาว

ความถืกใจไว้คราวหลัง      จั่งรักษากะยังได้  หลานเอย

54. ขี่เฮือฮั่วไปกลางน้ำ             ยามกลางคืนมืดค่ำ

เมียชั่วนำนายซังฮ้าย        ไผถืกเข่าจั่งแม่นซวย  หลานเอย

55. ถึงสิเป็นพี่น้อง               ยืมเงินทองจดไว้แน

เฮ็ดสัญญาให่ถืกต้อง        เทือได้ฟ้องจั่งได้คืน  หลานเอย

56. คันบ่ได้ด้วยเล่ห์              เพทุบายแต่งกลใส่

คันแม่นยังบ่ได้                ใช้มนต์พร้อมเป่าคาถา  หลานเอย

57. ให่เจ้าอดทนไว้               ไฟแดงยังเปิดอยู่

ไฟเหลืองให่เตรียมพร้อม    ไฟเขียวขึ่นจังค่อยไป  หลานเอย

58. มื้อนี้เฮ็ดบ่แล้ว               มื้ออื่นกะยังมี

เวลายังหลายปี             มันต้องมีมื้อแล้ว  หลานเอย

59. อดกลั้นไว้                      อดทนแถมตื่ม

อดออมเงินอีกพร้อม      สามอดนี้แม่นดีหลาย  หลานเอย

60. ความจริงนั้น                  เว้าหลายมันกะล่าย

ความจริงหลายเว้าหน่อย         มันบ่ฮู้เรื่องราว  หลานเอย

61. ความสุขนั้น                   มีแล้วสูญเสียได้ง่าย

ส่วนความทุกข์ยากไฮ้      ได้มาแล้วอยู่บ่หนี  หลานเอย

62. ความสุขนั้น                   คันอยากได้กะเป็นทุกข์

ให่ทำใจว่าซ่างมัน                      สุขสิลอยมาโลด  หลานเอย

63. บ้านใด๋เมียด่าป้อย         หมาฮ้ายเห่ากัดคน

บ้านนั้นจนทนทุกข์                     สุขแล่นหนีไปสิ้น  หลานเอย

64. การเลือกผัวเมียนั้น        ให่เจ้าเลือกด้วยสองหู

คันเลือกดูด้วยสองตา                 อาจสิพาเพได้  หลานเอย

65. แต่งงานแล้ว                  มีตาเดียวมันจั่งแม่น

ตาข่างหนึ่งให่หลับไว้         หูกะด้ามดังกัน  หลานเอย

66. ได้เมียฮูปฮ่างฮ้าย           แต่ใจดีเป็นที่หนึ่ง

ดีกว่างามบูดบึ้ง          มือชี้ใช้แต่ผัว  หลานเอย

67. แต่งงานแล้ว                  สันดานเดิมสิออกย่าง

ลายข้างหลังสิออกวิ่ง         ความจริงแท้สิออกลาย  หลานเอย

68. ผู้ที่รวยล้นฟ้า                 ขาสิย่างคุงดิน

หากินเทิงเดือนดาว      สาวไหมอยู่เทิงฟ้า  หลานเอย

69. ผู้ที่ทุกข์ยากไฮ้      ขาย่างบ่คุงดิน

หากินแต่ของเมา    สาวขาย่างเลาะบ้าน  หลานเอย

70.  เจ้าเกิดมาจนนั้น  มันบ่แม่นความผิด

เกิดมาจนแล้วยังจน  เป็นความผิดของเจ้า  หลานเอย

71.  เจ้าเกิดมารวยแล้ว   รวยต่อไปมันจั่งแม่น

เกิดมารวยแล้วยากแค้น  แม่นความผิดเจ้าแน่นอน  หลานเอย

72.  รวยย้อนเก็บกำได้  สิเติบใหญ่เป็นเศรษฐี

รวยย้อนพ่อแม่มี  บ่แน่นอนแล้วแต่เจ้า  หลานเอย  

73. คันเจ้าอ่อนแอนั้น  ใบกล้วยกะเป็นยักษ์

คันแม่นเจ้าเข้มแข็ง  ยักษ์สิกลายเป็นใบกล้วย  หลานเอย

74. ไทยสิเข่าอาเซียนแล้ว  เป็นแนวใด๋เฮาพร้อมบ่

  ความฮู้พอสู่เขาได้   เป็นนายจ้างหรือแหล่งเขา   หลานเอย

75.  โกงผู้อื่นนั้น  มันเสี่ยงตายบ่คุ้มค่า

ได้ทรัพย์มาแต่เดือดฮ้อน  ได้นอนลี้ย้านลูกปืน   หลานเอย

76.  คอรัปชั่น  บ้านเมืองบ่เฮืองฮูง

โทษทัณฑ์สูงได้เงินหน่อย  มันบ่คุ้มค่าเสี่ยงตาย  หลานเอย

77.  อย่าสิลักยักยอก  หลอกเอาเงินของท่าน 

  ยมบาลเพิ่นสิฮู้  กรรมฮ้ายสิไล่นำ หลานเอย

78. อย่าสิเป็นโขมยน้อย  จอบหลอยเอาของเพิน

เดินทางไปเส้นนี้   มันล่วงเข้าคุกตราง  หลานเอย

79.  อย่าสิมัวเมาเหล่น  การพนันขันต่อ

ม้นสิเหลือข่อหล่อ   แต่ตีนเจ้าเกิบบ่ยัง  หลานเอย

80.  เป็นขโมยลักของท่าน  บ่ทันโดนถืกจับจ่อง

ได้แบกขี้ไงง่อง   อยู่คุกพุ้นเมื่อยเหม็น  หลานเอย

81. อย่าสิยับหลักฮั้ว   ตั๊วเอาดินของหมู่เพิน

ทางเดินมันสิสั้น  เมืองบ้านสิกล่าวขวัญ  หลานเอย

82. ม็อบบ่มีเส้น  อย่าสิเป็นมันเสี่ยง

เพียงเฮาคึดกะคุกแล้ว  กินแต่แห้วบ่ได้เงิน  หลานเอย

83. ม็อบมีเส้น  แม่นสิเป็นกะบ่เสี่ยง

เสบียงบ่อึ้ดอยาก  ได้เงินพร้อมจั่งแม่นดี  หลานเอย

84. เสื้อแดงใส่อยู่บ้าน  ไปโรงพยาบาลใส่เสื้อสีอื่น

คันอยากอายุยืนให่จื่อไว้  อยากตายถิ่มแล้วแต่ใจ  หลานเอย

85. ใส่เสื้อเหลืองคนย้าน  ไปโรงพยาบาลหมอกะซ่อย

นายทหารใหญ่น้อย  ซ่อยเหลือพร้อมเคารพนำ  หลานเอย

86.  อย่าสิยับกรวยท่าน  พระอาจารย์สิทำโทษ

มอบเสื้อเหลืองสิโกรธเจ้า  เอาไปฆ่าถ่วงนที  หลานเอย

87.  ประชาธิปไตยไทยนั้น  ทหารเป็นผู้ยิ่งใหญ่

ข้าราชการเป็นลูกน้อง  ประชาชนต้องบ่ปากบ่ไอ  หลานเอย

88.  ประชาธิปไตยเจ๊กนั้น  พรรคคอมมิวนิสต์เป็นใหญ่

นายทหารเป็นลูกน้อง   ประชาชนต้องเข้าแถว  หลานเอย

89.  ประชาธิปไตยฝรั่งนั้น  ประชาชนเป็นใหญ่

นายทหารเป็นลูกน้อง  ข้าราชการต้องเป็นแหล่งเขา  หลานเอย

90.  ประเทศที่ก้าวหน้า  ประชาชนต้องเป็นใหญ่

ประชาชนเลือกไผแล้ว  ผู้นั้นละเป็นรัฐบาล  หลานเอย

91.  ประเทศล้าหลังนั้น  เผด็จการเป็นใหญ่

ไผยึดอำนาจรัฐได้   ผู้นั้นละเป็นรัฐบาล  หลานเอย

92.  แต่ละประเทศนั้น  แตกต่างบ่คือกัน

คนคือกันแต่บ่คือ  สะดือยาวสะดือสั้น

ฝันเห็นคนละด้าน  ไผมันแตกต่าง

เทิงบาดย่างบาดเว้า  บาดเด้ากะต่างกัน  หลานเอย

93. แม่นสิมีมีดพร้า  อย่าหาญสู้ผู้มีปืน

อายุเฮาสิบ่ยืน  ถืกลูกปืนตายจ้อย  หลานเอย

94. อย่าสุส่างขี่ไก่เดือนให่กายเป็นงูพิษ

อย่าสุสุมหัวคิดกับนักเลงกระจอก  หลานเอย

95. ฮู้ว่าของโตน้อบ  อย่าเอาเมียของใหญ่

เมียสิให่เฝ่าบ้าน  หนีไปเซิ้งฝรั่งดอง  หลานเอย

96. ผัวเมียนั้น  กูมึงอย่าได้ว่า

ข้อยและเจ้า  พากันเว้าจั่งสิเฮือง ซั้นแหล่ว หลานเอย

97. ผัวเมียนั้น  มึงมันอย่าได้เอ่ย

เคียดปานใดให่เฉยไว้  ไปหน้าสิดีเอง ซั้นแหล่ว หลานเอย

98. .ผัวเมียนั้น ถนอมใจกันไว้แน่

อย่าสุหลวมปากเว้า  คำฮ้ายบาดใจกัน  ซั้นแหล่ว หลานเอย

99. ผัวเมียนั้น ให่เว้าม่วนนวลหู

อย่าหูลูขึ้นเสียง  เถียงกันมันสิฮ้าง ซั้นแหล่ว หลานเอย

100. อย่าสุโพนทะนาโอ้ อวดแฟนโตว่ายาวใหญ่

ยายจังไฮข้างบ้าน  สิหลอยลึ้งลักลอง ซั้นแหล่ว หลานเอย

101. อย่าสุคุยโวเว้า ว่าแฟนเฮาขาวอวบใหญ่

หนุ่มจังไฮข้างบ้าน  สิหลอยลึ้งลักเอา ซั้นแหล่ว หลานเอย

102. คันแม่นได้แฟนเถ่า สิเอาใจบ่เหินห่าง

ได้แฟนยังส่ำน้อย  มักหล็อยเล่นบ่ห่วงเฮา ซั้นแหล่ว หลานเอย

103. คันพ้อบ่าวสาวเถ่า การงานดีมีสง่า

ฐานะดีใช้ได้  ฮักเฮาให้แต่งเลย ซั้นแหล่ว หลานเอย

104. ความสาวคือดอกไม้ บานบ่ดนกะแห่งเหี่ยว

อย่าสุเคียวทะลุฟ้า   ไปหน้าได้ขึ้นคาน ซั้นแหล่ว หลานเอย

105. ความสวยตัดแต่งได้ แต่ความสาวบ่คืนเก่า

อยู่ไปดนกะแห่งเถ่า   เอาเงินจ้างกะบ่ฟัง  ซั้นแหล่ว หลานเอย

106. สรรพสิ่งในโลกหล้า บ่มีดอกสิคงทน

บ่ว่าคนหรือสัตว์  สิ่งของทั้งหลายสิ้น

ทั้งแผ่นดินแผ่นฟ้า   อากาศน้ำภูเขา

เปลี่ยนบ่เซาคือกัน   เกิดแล้วตายไปคู่มื้อ  ซั้นแหล่ว หลานเอย