หลักราชการ(ผญา)

-หลักราชการนั้นสำคัญที่นายสั่ง    

นายเว้าหยังกะถืกต้อง เป็นลูกน้องอย่าลืนความ  น้องเอย

-กฎข้อหนึ่งนั้น นายบ่กระทำผิด     

กฎข้อสองนายทำผิด ให่อ่านกฎข้อหนึ่งอีก  น้องเอย

-มีหน้าที่แล้วบ่กระทำตามหน่าที่  

อำนาจมีแล้วบ่ใช้ ภัยสิย้อนแล่นเถิง  น้องเอย

-อิทธิพลเกิดย้อน ใช้กำลังข่มขู่   

ใช้ปืนผาหน้าไม้ ข่มเหงให้เชื่อฟัง  น้องเอย

-บารมีเกิดย้อน ทำความดีต่อผู้อื่น   

ยื่นไมตรีฮักแพง แบ่งปันบ่มีฮ้าย  น้องเอย

-คันสิย่างไปหน้า ให่เบิ่งตาเฮือม้าก่อน   

ใจฮ้อนย่างสุ่มสี่สุมห้า ขุนแพ้บ่ได้ไอ  น้องเอย

-น้ำไหลแฮงอย่าแข็งข่อถ่อเฮือขวางอย่างเด็ดขาด 

พลาดพลั้งเฮือพลิกคว่ำจมน้ำได้ตายเย็น  น้องเอย

-เสียงฟ้าผ่าเปรี้ยงปร้าง  อย่าสิย่างกลางแปลง   

รามสูรย์แยงเห็นสิขว้างขวานใส่หัวเจ้า  น้องเอย

-อย่าสิมัวแต่อ้าง ว่ากะซ่างหัวมัน   

ถิ่มไว้นานเป็นหลาย สิโพดโพเป็นโคม่า  น้องเอย

-อย่าสิมัวเมาเล่น การพนันเบี้ยโบก  

ลางเทือโชคบ่ให่ ถืกจับแล้วไล่ออกนำ  น้องเอย

-ผิดอาญานั้น โทษทัณฑ์ถึงไล่ออก   

สารภาพผิดบ่ได้ ปฏิเสธไว้อย่างเดียว  น้องเอย

-ปัญหามีให่ฟ้าวแก้ อย่าสิแซ่ไว้โดนหลาย   

มันสิกลายเป็นยักษ์ ถือสากมองไล่ถองเจ้า น้องเอย

……………………………………………………………………………..