บั้นทุกข์(ผญา)

-ทุกข์ย้อนเป็นนายท้าย  พายเฮือให่คนนั่ง

พอเถิงฝั่งผัดถีบเปรี้ยง  เฮือเอียงล่มบ่หล่ำเหลียว  พี่น้องเอย

 

-ทุกข์ย้อนเป็นผู้เถ่า  มีเมียสาวสวยเด่น

คนหนุ่มเห็นยาดเอาซ้ำ  นำหาพ้อกะบ่คืน  พี่น้องเอย

 

-ทุกข์ยากย้อน  หลอยไปลุยของใหม่

ถุงอนามัยบ่มีใช้  เป็นเอดส์แล้วปัวบ่เซา  พี่น้องเอย

 

-ทุกข์ย้อนไก่บั้กโจ้น   คอโกร๋นตีเป็นต่อ

ตีพอพอผัดแล่นลี้  หนีหน้าบ่สู้เขา  พี่น้องเอย

 

-ทุกข์ย้อนเมียเป็นไข้  ได้เบาหวานมาเป็นหมู่

สิขึ้นครูกะบ่ได้  สิไปจ้างกะขาดเงิน  พี่น้องเอย

 

-ทุกข์ย้อนแก่ย้อนเถ่า  เป็นบ่เซาปัวจนเมื่อย

อยู่เฉยเฉยกะยังเถ่า  ปัวหลายแล้วเถ่ากว่าเดิม  พี่น้องเอย

 

-ทุกข์ยากล้ำ  นำฮักสาวบ่มีเงินแต่ง

ค่าดองแพงเอาฮ้าย  ต่อได้กะบ่ลง  พี่น้องเอย

 

-ทุกข์ยากย้อน อยากมีเป็นนำหมู่

สู้งานเมื่อยเมิดมื้อ เกือบมอดม้วยกะบ่มี  พี่น้องเอย

 

-ทุกข์ยากย้อน จูงมอร์ไซด์ยางแตก

แดดกะฮ้อนเปรี้ยงเปรี้ยง  ร้านซ่อมจั๊กอยู่ใส      พี่น้องเอย

 

-ทุกข์ยากย้อน จูงมอร์ไซด์ยางแตก

ฝนตกฮำหมาเห่าหุ่ม ซุมควายฮ้ายไล่ชน  พี่น้องเอย

 

-ทุกข์ยากย้อน  หลงทางไกลยามค่ำ

น้ำมันรถเมิดแล้ว  ปั้มหลังหน้าจั๊กอยู่ใส  พี่น้องเอย

 

-ทุกข์ยากย้อน  มีเมียสองคือเพิ่นว่า

ไปหาหลวงกะถืกตื้บ ไปหาน้อยกะถืกตี  นางเอย

 

-ทุกข์ยากย้อน  ลูกติดเกมส์เฮือนบ่อยู่

หมู่โทรเอิ้นไปคู่มื้อ  นอนหลับแล้วจอบหลอย  พี่น้องเอย

 

-ทุกข์ยากย้อน  ลูกติดเกมส์ไปเฮียนต่อ

พออาจารย์ส่งเกรดให่ หงายหลังตั้มได้แต่ศูนย์  พี่น้องเอย

 

-ทุกข์ยากย้อน  ยืมเงินมาดาวน์รถ

ยามสิ้นเดือนงวดต้องเสีย   ดอกเบี้ยนำต้องหาใช้  พี่น้องเอย

 

-ทุกข์ยากย้อน  นอนผู้เดียวบ่มีคู่

นอนตะแคงคดคีคู้ หงายคว่ำกอดแต่หมอน  นางเอย

 

-ทุกข์ยากย้อน   เป็นนายค้ำประกันเขา

เขาเอาเงินแล้วหนี  ถิ่มให้เฮาเป็นลูกหนี่  พี่น้องเอย

 

-ทุกข์ยากย้อน    ออนซอนสาวใช้ใหม่

เหลียวเบิ่งหลายกะบ่ได้    เมียฮ้ายสิไล่หนี   นางเอย

 

-ทุกข์ยากย้อน     ออนซอนสาวขึ่นใหม่

เหลียวเบิ่งหลายกะบ่ได้  เมียฮ้ายว่าหัวงู  นางเอย

 

-ทุกข์ยากย้อน    ออนซอนเมียผู้อื่น

เมียเจ้าของงามแต่กี้  เดียวนี้บ่เป็นตา  นางเอย

 

-ทุกข์ยากย้อน   นอนกรนคนหนีหน่าย

เมียบ่นอนอยู่ใกล้   กางมุ้งให้นอนผู้เดียว นางเอย

 

-ทุกข์ยากย้อน    หมอตอนหำแต่ยามหนุ่ม

กลุ้มใจของบ่ขึ้น    ยืนเยี่ยวฮวดบักไข่หำ  นางเอย

 

-ทุกข์ยากย้อน   เป็นคนดีเขาให่ซ่อย

เดิ้กดื่นลุกนั่งป้อย  เป็นลูกหนี่บ่ได้ยืม  หลานเอย

 

-ทุกข์ยากล้ำ   ผิวก่ำดำหมอง

หัวกะหยองท้องมาน    ปานกันกับเป็นเอดส์  นางเอย

 

-ทุกข์ยากล้ำ    ผิวก่ำดำหมอง

นอนคองถ่ามื้อตาย    เป็นมะเร็งปนเอดส์  นางเอย

 

-ทุกข์ยากล้ำ      ใส้ลงหำไข่อึงลืง

นอนกืงดืงเฝ่ามุ้ง    ยุงไห่อ้อมอยากอยู่นำ  นางเอย

 

-ทุกข์ยากล้ำ     หากินนำบ่อนไก่

ลางเทือโชคบ่ให่  เสียสามข่างจั่งแมนซวย  พี่น้องเอย

 

-ทุกข์ยากไฮ้                    หากินงายได้กินค่ำ

จนหน้าดำค้ำม้ำ                         นำไง้ก่นอีปู   พี่น้องเอย

 

-ทุกข์ยากไฮ้    บ่มีแฮงแข้งขาล่อย

ต้อดไปเทือละหน่อย    ทางไปส้วมจั่งแม่นไกล  พี่น้องเอย

 

-ทุกข์ยากไฮ้    เถ่าหลายแข่วกะหล่น

คนที่เคยฮ่วมบ้าน  ตายนานแล้วเหลือแต่เฮา  ซั้นแหล่ว  พี่น้องเอย

 

-ทุกข์ยากไฮ้  แฟนหนีไปนำผู้บ่าว

ถิ่มให้เฮาเลี้ยงลูกถ่า   ฮอดปีหน้าจั่งสิมา     พี่น้องเอย

 

-ทุกข์หลายเอากะด้อ   ลูกจบป.ตรีมาใหม่

ไปสอบใสกะบ่ได้   อยู่ในบ้านเล่นแต่เกมส์  พี่น้องเอย

 

-ทุกข์บ่มีเงินใช้  ไปกูู้ใสเพินกะว่า

หกสิบกว่ากู้บ่ได้  เถ่าแล้วให่ถ่าตาย  พี่น้องเอย

 

-ทุกข์ย้อนแก่ย้อนเถ่า   บ่เซาอยากเซากิน

ต้องดิ้นรนแสวงหา   ฝ่าฟันไปพอได้หย่ำ  พี่น้องเอย

 

-ทุกข์ย้อนขี่รถฮ้าง  ตายกลางดงยามค่ำ

ฝนตกฮำฟ้าฮ้อง  มองขวาซ้ายย้านแต่ผี  พี่น้องเอย

 

 -คันอยากพ้นทุกข์นั้น       หมั่นทำใจให้ว่างเปล่า

เซาปรุงแต่งว่าดีฮ้าย    ความทุกข์นั้นสิเหือดหาย พี่น้องเอย

………………………………………………………………………..